Gjykata rrëzon padinë e Elon Musk kundër OpenAi: Kanë kaluar afatet

Një gjykatë në Kaliforni ka rrëzuar padinë e miliarderit Elon Musk kundër kompanisë OpenAI dhe drejtuesit të saj Sam Altman, duke i dhënë fund një prej përplasjeve më të forta në industrinë e inteligjencës artificiale.

Vendimi u mor unanimisht nga juria, e cila arriti në përfundimin se Musk kishte pritur shumë gjatë për të ngritur padinë dhe se pretendimet e tij kishin humbur vlefshmërinë ligjore për shkak të afateve.

Musk akuzonte Altman dhe OpenAI se kishin shkelur misionin fillestar jofitimprurës të kompanisë, pasi sipas tij ajo u kthye në një strukturë fitimprurëse pasi ai kishte kontribuar me rreth 38 milionë dollarë në fazat e hershme të krijimit të saj.

Sipas Musk, OpenAI ishte themeluar për të zhvilluar inteligjencën artificiale në shërbim të njerëzimit dhe jo për përfitime financiare. Ai pretendoi se ishte mashtruar nga drejtuesit e kompanisë.

Procesi gjyqësor zgjati tre javë dhe përfshiu dëshmi nga vetë Musk, Sam Altman dhe drejtues të tjerë të industrisë së teknologjisë, përfshirë CEO-n e Microsoft, Satya Nadella.

Nga ana tjetër, Altman deklaroi në gjykatë se Musk jo vetëm kishte mbështetur idenë që OpenAI të bëhej kompani fitimprurëse, por kishte kërkuar edhe kontroll afatgjatë mbi të.

OpenAI e cilësoi vendimin si një “fitore të madhe”, ndërsa përfaqësuesit e kompanisë thanë se padia ishte një përpjekje e Musk për të ngadalësuar një konkurrent në fushën e inteligjencës artificiale.

Megjithatë, avokatët e Musk deklaruan se po shqyrtojnë mundësinë e apelimit të vendimit, çka mund ta zgjasë më tej betejën ligjore mes palëve.

OpenAI u themelua në vitin 2015 nga Musk, Altman dhe bashkëthemelues të tjerë, por Musk u largua nga kompania në vitin 2018 pas mosmarrëveshjeve për drejtimin dhe kontrollin e saj.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)