Kosova shpenzon 1 miliard dollarë për armatime, gjenerali i ushtrisë serbe: Problematike!

Prestigjozja Bloomberg i ka dedikuar një reportazh Forcës së Sigurisë së Kosovës dhe misionit të Prishtinës zyrtare për ta kthyer atë në një ushtri. Aty evidentohet se Kosova ka blerë pajisje me vlerë 460 milionë euro në vitet e fundit, me plane që përfshijnë sisteme të mbrojtjes ajrore, artileri 155 mm dhe helikopterë ‘Black Haëk’ që pritet të arrijnë nga SHBA-të.

Bloomberg ka intervistuar edhe ministrin e Mbrojtjes së Kosovës, Ejup Maqedonci, i cili thotë se ndërtimi i një ushtrie është një “hap i madh” drejt një force që mund të mbrojë vendin, të mbrojë qytetarët dhe të bashkëpunojë me partnerët.

Kosova filloi ndërtimin e forcave të saj të armatosura në vitin 2017, me mbështetjen e SHBA-së, Gjermanisë, Mbretërisë së Bashkuar dhe Francës. Afati i fundit është një dekadë dhe buxheti është 1 miliard dollarë. Ushtria aktuale aktive ka disa mijëra ushtarë dhe janë blerë armë dhe pajisje me vlerë 460 milionë euro. Sipas planeve të Maqedoncit, Kosova duhet të ketë pesë mijë ushtarë dhe tashmë ka tre herë më shumë pushkë sesa ushtarë.

Ministri thekson se nuk do të prezantojë shërbimin e detyrueshëm ushtarak, por do të mbështetet te vullnetarët, ndërsa evidentohet fakti se të gjithë oficerët janë trajnuar në SHBA ose si pjesë e programit të NATO-s.

Maqedonci thotë se FSK-ja ka nevojë për helikopterët për transport, evakuim, shuarje zjarresh dhe operacione të tjera, veçanërisht për shkak të zjarreve të shpeshta në pyje gjatë verës. Ata gjithashtu po përgatiten të prodhojnë municione të NATO-s (5.56 dhe 7.62 mm) në një kompleks të ri industrial në Gjakovë. Kosova aktualisht shpenzon pak më shumë se dy përqind të PBB-së së saj për mbrojtje, më shumë se fqinjët e saj që janë tashmë anëtarë të NATO-s.

Ndërtimi dhe modernizimi i ushtrisë në asnjë vend nuk është i lehtë, por në mjedisin në të cilin ndodhet Kosova, është pothuajse i paimagjinueshëm. Rreth gjysma e vendeve të botës e njohën pavarësinë e Kosovës, të shpallur në vitin 2008, por Serbia nuk e bëri, me mbështetjen e Rusisë dhe Kinës dhe pesë anëtarëve të Bashkimit Evropian. Beogradi nuk e konsideron ushtrinë në Prishtinë si legjitime dhe sipas Bloomberg ërpjekjet për të transformuar forcat e sigurisë së Kosovës në një ushtri dhe për t'u bashkuar me aleancat ushtarake janë veçanërisht problematike për Shefin e Shtabit të Përgjithshëm të Serbisë, Gjenerali Milan Mojsiloviç.

"Ne e konsiderojmë KFOR-in si të vetmin formacion të armatosur legjitim", përfundoi ai.

KFOR-i, misioni paqeruajtës i NATO-s në Kosovë që nga viti 1999, vazhdon të veprojë, veçanërisht në veri, ku jeton komuniteti serb dhe ku herë pas here kanë ndodhur incidente të dhunshme. Që nga ndërhyrja që dëboi forcat serbe nga Kosova në vitin 1999, misioni është zvogëluar me rreth 90 përqind. Sipas burimeve të Bloomberg që janë të njohura me situatën, reduktime të mëtejshme të misionit janë të mundshme, por jo një heqje e plotë e trupave.

Analisti i Grupit Ndërkombëtar të Krizave, Marko Prelec, paralajmëron se fokusi në ndërtimin ushtarak është renditja e gabuar e prioriteteve. Derisa Kosova dhe Serbia të arrijnë një marrëveshje afatgjatë, në të cilën Beogradi do të pranonte pavarësinë e Kosovës dhe Prishtina do të garantonte një nivel të caktuar autonomie për pakicën serbe në veri, çdo zgjerim ushtarak, thotë Prelec, "e vendos qerren përpara kalit".

Ndërkohë, Maqedonci në krahun tjetër dëshiron t’i bindë aleatët se Ushtria e Kosovës nuk është më një grup guerilas, por një forcë serioze që kontribuon në stabilitetin rajonal.

Megjithatë, shumë analistë paralajmërojnë se forcimi i ushtrisë pa një marrëveshje me Beogradin mund t’i ndërlikojë më tej marrëdhëniet në Ballkan.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)