Vjedhja e Luvrit bëhet film, ja kur del në kinema

Vjedhja spektakolare në muzeun e Muzeu i Luvrit, e ndodhur më 19 tetor 2025, është kthyer në një nga ngjarjet më të bujshme të viteve të fundit dhe pritet të shndërrohet edhe në film artistik.

Sipas mediave franceze, mbi këtë ngjarje është duke u zhvilluar një projekt kinematografik që do të drejtohet nga regjisori francez Romain Gavras. Projekti është bërë publik nga “Le Film Français” dhe do të bazohet në një libër që publikohet më 27 maj nga shtëpia botuese Flammarion.

Libri mban titullin “Main basse sur le Louvre” dhe është shkruar nga Jean-Michel Décugis, Jérémie Pham-Lê dhe Nicolas-Charles Torrent. Ai trajton në detaje mënyrën se si ndodhi grabitja, duke përfshirë edhe dokumente dhe raporte që nuk ishin bërë publike më parë.

Filmi pritet të dalë në kinema në vitin 2028, ndërsa ende nuk janë bërë të ditura titulli zyrtar dhe aktorët që do të marrin pjesë. Sipas raportimeve, projekti do të realizohet nga kompania “Iconoclast”, e cila ka bashkëpunuar më herët me regjisorin në filmin “Athena”.

Ngjarja e 19 tetorit 2025 u cilësua si “grabitja e shekullit”. Katër persona arritën të hynin në Galerinë e Apollonit brenda muzeut dhe të merrnin në vetëm pak minuta nëntë bizhuteri historike me vlerë rreth 88 milionë euro, që i përkisnin koleksionit të Napoleonit III. Grabitja ndodhi në mes të ditës, në prani të vizitorëve, dhe zgjati më pak se 7 minuta.

Pavarësisht disa arrestimeve, sendet e vjedhura nuk janë gjetur ende. Hetimet zbuluan gjithashtu mangësi serioze në sistemin e sigurisë së muzeut, çka solli edhe dorëheqjen e drejtoreshës Laurence des Cars.

Për të rikthyer imazhin e muzeut, presidenti i Francës Emmanuel Macron ka njoftuar një plan të madh rinovimi dhe modernizimi, me një kosto të vlerësuar rreth 800 milionë euro, i cili përfshin edhe përmirësime të mëdha në siguri. Plani është quajtur “Luvri – Rilindje e Re”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)