Zgjedhjet në Kosovë, KQZ afron datën kur nis votimi me postë

Komisioni Qendror i Zgjedhjeve ka vendosur ndryshimin e planit të aktiviteteve për organizimin e zgjedhjeve të parakohshme për Kuvendin e Kosovës, duke prekur edhe afatin e votimit me postë.

Sipas vendimit të KQZ, procesi i votimit me postë, i cili fillimisht ishte parashikuar të niste më 25 maj, do të fillojë më herët dhe pikërisht më 21 maj.

Ky ndryshim është bërë pas njoftimit nga kompania kontraktuese për shërbime postare, sipas të cilës operatori DHL dhe shërbimet postare në disa vende evropiane nuk do të funksionojnë më 25 maj për shkak të një feste zyrtare. Për rrjedhojë, në periudhën 22–26 maj nuk do të ketë shpërndarje dhe pranim të dërgesave postare.

Për të shmangur vonesat në procesin e votimit nga diaspora, KQZ ka vendosur që përgatitjet dhe dërgimi i pakove me fletëvotime për qytetarët e regjistruar të kryhen më herët se afati i planifikuar fillimisht.

Autoritetet zgjedhore theksojnë se ky ndryshim synon të garantojë mbarëvajtjen e procesit dhe të sigurojë që të gjithë votuesit jashtë vendit të kenë mundësi të ushtrojnë të drejtën e votës pa pengesa logjistike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)