“Gjuha shqipe nuk negociohet”, studentët shqiptarë protestë madhështore në Shkup

Mijëra studentë shqiptarë dhe qytetarë nga treva të ndryshme shqipfolëse protestuan këtë të hënë në qendër të Shkupit, duke përsëritur edhe njëherë qëndrimin që provimi i jurisprudencës në Maqedoninë e Veriut të zhvillohet edhe në gjuhën shqipe.

Protesta nisi pasditen e sotme në zonën e Urës së Gurit, e cila u mbush me flamuj kuqezi dhe pankarta me mesazhe si: “Gjuha shqipe nuk negociohet”, “Duam provimin në shqip” dhe “Mos ma përktheni të ardhmen”.

Studentët kërkuan dorëheqjen e ministrit të Drejtësisë, Igor Fillkov, duke e akuzuar për refuzimin e kërkesës së tyre për përdorimin e gjuhës shqipe në provimin e jurisprudencës.

Në protestë morën pjesë studentë nga Shkupi, Tetova, Struga, Kumanova dhe Kosova, ndërsa organizatorët theksuan se bëhet fjalë për një kauzë qytetare dhe jo politike.

Gjatë ditës pati edhe tensione dhe raportime për ndalime në kufi të autobusëve me studentë që udhëtonin drejt Shkupit nga Kosova dhe Shqipëria. Organizatorët pretenduan se disa pjesëmarrës u penguan të hynin në Maqedoninë e Veriut, ndërsa autoritetet maqedonase folën për probleme teknike në sistemin kufitar.

Kjo është protesta e dytë e madhe e studentëve shqiptarë pas demonstratës së 6 prillit, ku po ashtu u kërkua zbatimi i Ligjit për përdorimin e gjuhëve.

Sipas Ligjit për Përdorimin e Gjuhëve në Maqedoninë e Veriut, institucionet shtetërore duhet të mundësojnë përdorimin e gjuhëve që fliten nga mbi 20% e qytetarëve, përfshirë gjuhën shqipe. Studentët argumentojnë se nuk ekziston asnjë dispozitë ligjore që ndalon zhvillimin e provimit të jurisprudencës në shqip.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)