Kosova drejt krijimit të Xhandarmërisë, njoftimi i ministrit Sveçla: Synon mbrojtjen e territorit

Kosova ka nisur zyrtarisht hapat e parë për krijimin e Xhandarmërisë, një strukturë e re sigurie që synon forcimin e rendit dhe mbrojtjes së territorit të vendit. Lajmi u bë i ditur nga ministri në detyrë i Punëve të Brendshme, Xhelal Sveçla, i cili njoftoi se është themeluar grupi punues që do të analizojë mënyrën e organizimit dhe funksionimit të këtij institucioni të ri.

Sipas Sveçlës, Xhandarmëria do të funksionojë si agjenci në kuadër të Ministrisë së Punëve të Brendshme dhe do të ketë rol kyç në ruajtjen e kufijve, mbrojtjen e sovranitetit territorial, luftën kundër terrorizmit dhe menaxhimin e situatave me rrezikshmëri të lartë.

Ai theksoi se kjo forcë do të shërbejë për rritjen e kapaciteteve shtetërore në përballimin e kërcënimeve ndaj sigurisë publike dhe infrastrukturës kritike, duke garantuar një prezencë më të fortë të shtetit në terren.

Xhandarmëria njihet si një forcë sigurie me karakter ushtarak që kryen edhe detyra policore. Struktura të tilla funksionojnë në shumë vende të botës, përfshirë Serbia, ku xhandarmëria është pjesë e policisë, si edhe Franca, ku ajo ka status ushtarak dhe angazhohet në sigurinë publike, menaxhimin e krizave dhe misione ndërkombëtare.

Modeli francez konsiderohet një nga më të organizuarit në Evropë, me rol të rëndësishëm si në operacionet e rendit publik, ashtu edhe në bashkëpunimin me forcat ushtarake dhe policore brenda NATO-s.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)