Paralajmërimi i OBSH: Ebola mund të përhapet më shpejt nga sa mendohej

Një shpërthim i ri i virusit Ebola në lindje të Republikës Demokratike të Kongos ka shkaktuar frikë të madhe tek banorët dhe alarm ndërkombëtar, ndërsa Organizata Botërore e Shëndetësisë paralajmëron se rastet mund të jenë duke u përhapur më shpejt sesa mendohej.

Në provincën Ituri, që është edhe epiqendra e shpërthimit, banorët thonë se sëmundja po përhapet me shpejtësi dhe se të infektuarit po humbin jetën shumë shpejt. Deri tani, autoritetet raportojnë të paktën 131 viktima dhe mbi 513 raste të dyshuara në vend, ndërsa një rast është regjistruar edhe në Uganda.

Organizata Botërore e Shëndetësisë ka shprehur shqetësim se shifrat reale mund të jenë shumë më të larta se ato të konfirmuara, me vlerësime që sugjerojnë se mund të ketë mbi 1,000 raste të mundshme, për shkak të nënraportimit dhe vështirësive në identifikimin e rasteve.

Autoritetet dhe organizatat humanitare paralajmërojnë se situata po përkeqësohet për shkak të lëvizjeve të shumta të popullsisë, pasigurisë në rajon dhe mungesës së informacionit dhe pajisjeve mbrojtëse. Disa vende fqinje kanë forcuar kontrollet kufitare, ndërsa Uganda ka marrë masa parandaluese për të kufizuar përhapjen.

OBSH dhe partnerët ndërkombëtarë po dërgojnë ndihma mjekësore dhe pajisje mbrojtëse, ndërsa po shqyrtohen edhe trajtime të mundshme, pasi për këtë variant të virusit nuk ekziston ende një vaksinë e miratuar.

Ebola është një sëmundje virale që përhapet përmes kontaktit me lëngjet trupore të infektuara dhe mund të shkaktojë simptoma të rënda si ethe, të vjella, diarre dhe në disa raste gjakderdhje dhe dështim organesh.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)