“Do ta sulmonim Iranin për një orë”, Trump: Na thanë të durojmë se po sillen mirë

Presidenti i Shteteve të Bashkuara, Donald Trump deklaroi se ishte shumë pranë marrjes së vendimit për të ndërmarrë një sulm ndaj Iranit të martën, përpara se të bindej që ta shtynte operacionin për disa ditë.

“Ne ishim gati të niseshim… do të kishte ndodhur” u tha Trump gazetarëve në Shtëpinë e Bardhë, duke komentuar se sa afër ishte urdhërimi i sulmit që, sipas tij, do të kishte shënuar përshkallëzim të drejtpërdrejtë të konfliktit mes SHBA-së dhe Iranit.

Ai tha gjithashtu se vendimi ishte marrë, por më pas disa liderë të Lindjes së Mesme kërkuan shtyrjen e sulmit për shkak të diskutimeve në zhvillim me Teheranin.

“Unë nuk i kam thënë askujt kur do të ndodhte,” u shpreh Trump. “Por ishim shumë afër. Do të thoja se isha një orë larg marrjes së vendimit për ta bërë sot.”

Ai shtoi se liderët e rajonit e kontaktuan pasi kishin dëgjuar se vendimi ishte marrë: “Na thanë: ‘Zotëri, mund të na jepni edhe disa ditë, sepse mendojmë se ata po sillen në mënyrë të arsyeshme?’”

Në deklaratat e tij, Trump theksoi se Irani ka një afat të kufizuar për t’u rikthyer në tryezën e bisedimeve, duke përmendur se kjo mund të jetë “dy ose tre ditë, ose deri në fund të javës”.

“Është një periudhë e kufizuar kohore, sepse ne nuk mund t’i lejojmë ata të kenë armë bërthamore,” tha ai.

Trump shtoi gjithashtu: “Të gjithë thonë se është jopopullore, por unë mendoj se është shumë popullore kur njerëzit kuptojnë se bëhet fjalë për armë bërthamore që mund të shkatërrojnë qytete të mëdha si Los Anxhelosi.”

Sipas tij, mbështetja publike varet nga mënyra se si shpjegohet situata: “Kur ua shpjegojmë njerëzve, mendoj se është vërtet popullore. Por pavarësisht nëse është apo jo, unë duhet ta bëj atë që mendoj se është e drejtë”, përfundoi presidenti.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)