Ndërtimet pa leje në bregdet, Lamallari dhe Hita nga Saranda: Mos prisni sa të ngrihet betoni 7 kate

“Ne nuk mund të presim derisa të ngrihet një beton 7-katësh për të reaguar”. Ky ishte paralajmërimi që ministri i Brendshëm Besfort Lamallari bëri sot nga Saranda, aty ku skandali i “CopaCabana”-s, beach bar-it pa leje të lidhur me persona me precedentë kriminalë, solli arrestime dhe shkarkime në radhët e Policisë së Shtetit.

Pas ministrit edhe drejtori i policisë, Skënder Hita, dha një mesazh të prerë duke thënë se “askush nuk është mbi ligjin dhe uniforma e Policisë nuk do të përdoret si mburojë për paligjshmërinë”.

Pas operacionit të AMP-së që çoi në arrestimin e drejtuesve dhe efektivëve të komisariatit të Sarandës, ministri Lamallari, drejtori i Policisë së Shtetit Skënder Hita dhe drejtues të IKMT-së zhvilluan një takim me strukturat lokale të qytetit bregdetar për kontrollin e territorit dhe sigurinë.

Lamallari e cilësoi të papranueshëm çdo tolerim ndaj ndërtimeve pa leje apo zaptimit të hapësirave publike, duke theksuar se bregdeti shqiptar është pasuri kombëtare.

“Saranda dhe gjithë bregdeti shqiptar është pasuri kombëtare. Nëse dikush mendon se interesat publike mund të trajtohen si interesa private, gabon rëndë. Reagimi i strukturave ishte mesazhi i parë që nuk mund të ketë lojëra me ligjin”, deklaroi ai.

Ministri kërkoi hetim të plotë për rastin e “CopaCabana”-s, duke paralajmëruar pasoja për çdo punonjës policie që i hap derën paligjshmërive. “Kjo çështje kërkon hetim të thelluar. Kush ka detyrë të zbatojë ligjin duhet ta bëjë me nder. Çdokush tjetër që mendon të mbyllë sytë apo të flirtrojë me paligjshmërinë, duhet t’i bëjë vetë llogaritë”, tha Lamallari.

Ai më tej ngriti shqetësimin edhe për sigurinë publike në zonat turistike, duke përmendur rastet e armëmbajtjes pa leje dhe sjelljeve të rrezikshme në rrugë.

Nga ana tjetër, drejtori i Policisë së Shtetit, Skënder Hita, u shpreh se ngjarja në Sarandë ka cenuar besimin te uniforma blu, por theksoi se Policia nuk identifikohet me veprimet e disa individëve.

“Është e papranueshme që një punonjës policie të bëhet palë me shkelësit e ligjit. Kushdo që mban uniformën duhet të jetë në anën e qytetarëve dhe ligjit. Askush nuk është mbi ligjin”, deklaroi Hita.

Ai shtoi se strukturat policore do të vijojnë goditjen ndaj ndërtimeve pa leje dhe çdo forme kriminaliteti në bregdet.

Operacioni i AMP-së i nisur të premten në Sarandë dhe Ksamil zbuloi përfshirjen e shefit të komisariatit të Sarandës, Gëzim Bashllari, si dhe tre efektivëve të tjerë, të cilët dyshohet se kishin dijeni dhe toleronin funksionimin e beach bar-it dhe plazhit privat pa leje në këmbim të ryshfetit. Në kuadër të hetimeve u arrestuan 8 punëtorë, ndërsa në kërkim u shpall pronarja e objektit, Arjola Dhrami Bajo, ndërsa struktura pa leje u shemb nga IMT-ja.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)