Vrasja e studentes shqiptare në Itali, Prokuroria e Romës kërkon burg përjetë për ish të dashurin

Prokuroria e Romës ka kërkuar dënimin me burgim të përjetshëm për Mark Antony Samson, të akuzuarin për vrasjen brutale të studentes shqiptare Ilaria Sula, një ngjarje që tronditi opinionin publik në Itali.

Sipas organit të akuzës, krimi ishte i paramenduar dhe u krye me “gjakftohtësi ekstreme”. Gjatë seancës përmbyllëse, prokurorët deklaruan se Samson kishte planifikuar eliminimin e ish-të dashurës së tij dhe më pas kishte tentuar të fshihte gjurmët e krimit.

Zëvendësprokurori Giuseppe Cascini theksoi se i riu nuk tregoi asnjë shenjë pendese gjatë dhe pas vrasjes.

“E goditi pa mëshirë dhe më pas e fshehu trupin sikur të ishte mbeturinë. Edhe pas krimit, ai vazhdoi normalisht aktivitetet e tij, duke dalë për të ngrënë”, deklaroi Cascini në sallën e gjyqit.

Mark Antony Samson përballet me akuza për vrasje të rëndë me paramendim dhe fshehje kufome.

Trupi i pajetë i 22-vjeçares shqiptare u gjet më 2 prill 2025 brenda një valixheje të hedhur në një zonë të pyllëzuar në Poli, pranë Romës. Hetimet zbuluan se pas zhdukjes së saj, Samson kishte përdorur telefonin dhe profilet në rrjetet sociale të Ilarias për të krijuar përshtypjen se ajo ishte ende gjallë, në përpjekje për të shmangur dyshimet e familjarëve dhe autoriteteve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)