Regjistrohen raste me murtajën e bagëtive në Shkodër, ngordhin 20 dele, 60 të tjera do të asgjësohen

Murtaja e ruminantëve të vegjël është rikthyer sërish në qarkun e Shkodrës, duke ngritur alarmin tek autoritetet veterinare dhe fermerët e zonës. Vatra është identifikuar në njësinë administrative Dajç, konkretisht në fshatin Mali i Gjymtit, ku sëmundja ka prekur një tufë delesh.

Burime zyrtare bëjnë me dije se deri tani janë asgjësuar rreth 20 krerë bagëti të imta, ndërsa pritet të eliminohen edhe afro 60 të tjera, me qëllim frenimin e përhapjes së virusit. Pas konfirmimit të rastit, Ministria e Bujqësisë ka vendosur menjëherë zonën në karantinë, duke përcaktuar masa të rrepta kontrolli në një perimetër prej 3 deri në 10 kilometrash.

Autoritetet lokale thonë se ekziston dyshimi për praninë e rasteve të tjera në zonë, ndaj grupet veterinare kanë nisur kontrolle dhe analiza shtesë në fermat përreth.

Kontrolle intensive janë shtrirë edhe në zona të tjera të qarkut Shkodër, për shkak të rrezikut që paraqet lëvizja e bagëtive dhe kontakti mes tufave. Shërbimet veterinare po u bëjnë thirrje fermerëve të raportojnë çdo rast të dyshimtë dhe të shmangin lëvizjen e kafshëve jashtë zonave të kontrollit.

Murtaja e ruminantëve është një sëmundje virale që prek kryesisht delet dhe dhitë, por nuk përbën rrezik për shëndetin e njerëzve. Edhe gjatë vitit të kaluar në qarkun Shkodër u regjistruan disa vatra të ngjashme, duke detyruar autoritetet të ndërmarrin masa karantinimi dhe asgjësimi të bagëtive të infektuara.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)