“Ringjallen” kinematë në Shqipëri, 1.4 mln euro investim për rikthimin e filmit pranë publikut

Kinematë do të rikthehen në Shqipëri falë një projekti transformues të Ministrisë së Turizmit, Kulturës dhe Sportit, e cila ka parashikuar një fond prej rreth 1.4 milionë eurosh për vitin 2026, me qëllim modernizimin dhe rijetësimin e të paktën shtatë sallave të kinemasë në disa qytete të vendit.

Ministri Blendi Gonxhja, përmes një reagimi në rrjetet sociale, e cilësoi investimin si një hap domethënës për rikthimin e përvojës së filmit tek publiku i gjerë. Sipas tij, nisma synon jo vetëm përmirësimin e infrastrukturës, por edhe forcimin e industrisë vendase të filmit.

“Ky është një lajm i jashtëzakonshëm për kinemanë në Shqipëri. Me një investim prej rreth 1.4 milionë eurosh, synojmë të ri-jetësojmë kinematë dhe të rikthejmë magjinë e filmit në çdo cep të vendit”, u shpreh Gonxhja.

Sipas ministrit, rreth shtatë salla kinemaje do të përfitojnë nga ky projekt, duke u pajisur me teknologji moderne dhe ambiente më funksionale për shikuesit. “Modernizimi i sallave do të krijojë hapësira më tërheqëse dhe komode për publikun që dëshiron të shijojë artin e filmit”, theksoi ai.

Gonxhja vuri gjithashtu në dukje se investimi do të ketë ndikim pozitiv edhe për krijuesit shqiptarë. “Kjo iniciativë do të mbështesë industrinë lokale të filmit dhe do të hapë më shumë mundësi për artistët dhe profesionistët e fushës”, deklaroi ministri.

Projekti pritet të zbatohet nga fillimi i vitit të ri dhe shihet si një përpjekje për ta rikthyer kinemanë si një hapësirë kulturore aktive dhe të aksesueshme për publikun shqiptar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)