“Meloni me fytyrë engjëlli”: Pas restaurimit të Bazilikës, plasin polemikat në Itali

Restaurimi i Bazilikës së San Lorenzo në Lucina, një nga kishat më të vjetra të Romës, ka nxitur debat politik dhe publik. Gjithçka erdhi pas zbulimit se fytyra e një engjëlli, i ngjan asaj të kryeministres italiane, Giorgia Meloni.

Lajmi është raportuar nga mediat më të rëndësishme, që theksojnë se figura, e konsideruar më parë si një përfaqësim anonim, pas restaurimit ka marrë tipare të dallueshme dhe mban në dorë një kartelë ku është vizatuar harta e Italisë. Ndërhyrja nuk është kryer nga restaurues profesionistë të angazhuar në punimet e tjera të bazilikës, por nga një artist jo-profesionist, i quajtur Bruno Valentinetti.

Një dëshmitare ka pohuar se bëhet fjalë për një vullnetar, që çdo mëngjes shkon në kishë dhe qëndron aty disa orë. Ngjarja ka marrë përmasa politike dhe ka ngjallur reagime të forta. Partia Demokratike ka kërkuar ndërhyrje të menjëhershme të institucioneve përgjegjëse.

Kryetarja e grupit të PD-së në Komisionin e Kulturës të Dhomës së Deputetëve, Irene Manzi, deklaroi se ngjarja është “e papranueshme”. Sipas saj, çdo ndërhyrje që krijon imazhe të lidhura me figura bashkëkohore në objekte të mbrojtura, përbën shkelje të rëndë të Kodit të Trashëgimisë Kulturore.

Nga ana e tij, famullitari i bazilikës, Daniele Micheletti pohoi se ngjashmëria ekziston. “E pashë restaurimin pas leximit të lajmit dhe në fakt një farë ngjashmërie ka, por nuk di të them pse është realizuar në këtë mënyrë. Unë kisha kërkuar që kisha të restaurohej ashtu siç ishte,” është shprehur ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)