Femra më e famshme në historinë e njerëzimit ishte mbipeshë… dhe kishte çrregullim të tiroides

Një teori e re mbi portretin më të famshëm në botë ka hapur debat në komunitetin shkencor dhe artistik. Mjeku amerikan Michael Yafi ka deklaruar se Mona Lisa mund të ketë pasur mbipeshë dhe një çrregullim të tiroides. Sipas specialistit nga Universiteti i Teksasit, portreti i realizuar nga Leonardo da Vinci tregon shenja që mund të lidhen me hipotiroidizëm dhe nivele të larta kolesteroli.

Ai i paraqiti gjetjet e tij në Kongresin Europian për Obezitetin, duke theksuar se standardet e bukurisë kanë ndryshuar ndjeshëm ndër shekuj. Dr. Yafi argumenton se në periudhat e mëhershme trupat më të mbushur konsideroheshin simbol i pasurisë, statusit dhe fuqisë shoqërore. Si shembull ai përmend veprat e piktorit flamand Peter Paul Rubens, i njohur për figurat femërore të kolme që përfaqësonin idealin e bukurisë në atë kohë.

Sipas tij, tipare si lëkura e zbehtë dhe nuancat e verdha në portret mund të jenë tregues të një çrregullimi hormonal. Megjithatë, ai pranon se nuk mund të vendoset një diagnozë e saktë, pasi analiza bazohet vetëm në një vepër arti. “Ne nuk mund të vendosim një diagnozë të vërtetë. Ne vetëm analizojmë karakteristikat që shfaqen në portret”, është shprehur Yafi.

Ai shton se një shpjegim tjetër i mundshëm mund të jetë shtimi në peshë gjatë shtatzënisë, duke qenë se figura e portretit besohet të ketë qenë nënë e katër fëmijëve. Mjeku thekson gjithashtu se vetëm në gjysmën e dytë të shekullit XX u kuptua lidhja mes mbipeshës dhe sëmundjeve si diabeti apo problemet kardiovaskulare, gjë që ndryshoi mënyrën se si shoqëria e percepton trupin dhe rriti stigmatizimin ndaj obezitetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)