Krateri 900 metra zbulohet në majë të malit, të dhënat vijnë nga hapësira

Një grup studiuesish ka zbuluar një krater gjigant meteori në një zonë malore në jug të Kinës, i cili përfaqëson një nga gjetjet më të rëndësishme gjeologjike të viteve të fundit. Krateri, i quajtur Jinlin, është ruajtur në mënyrë të jashtëzakonshme brenda një shtrese graniti, e cila është gërryer shumë ngadalë ndër shekuj, duke e mbrojtur strukturën nga shkatërrimi.

Sipas hulumtuesve, krateri ka një diametër prej 820 deri në 900 metrash dhe një thellësi rreth 90 metra, duke u konsideruar si krateri më i madh i periudhës së Holocenit i zbuluar deri më sot. Holoceni është epoka gjeologjike aktuale, e cila nisi rreth 11.700 vjet më parë, pas përfundimit të epokës së fundit të akullnajave.

Krateri Jinlin është formuar si pasojë e përplasjes së një meteori me sipërfaqen e Tokës. Brenda strukturës janë gjetur kristale kuarci të formuara nga presioni ekstrem, një fenomen që, sipas ekspertëve, nuk mund të krijohet nga asnjë proces natyror tokësor. Studiuesi Ming Chen theksoi se këto struktura “janë prova të presioneve të jashtëzakonshme që vetëm përplasjet kozmike mund t’i gjenerojnë”.

Zbulimi konsiderohet me rëndësi të madhe për historinë gjeologjike të planetit, pasi shumica e kratereve të lashta janë zhdukur për shkak të erozionit. Studimi është publikuar në revistën shkencore Matter and Radiation at Extremes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)