Sekreti i jetëgjatësisë? Shkencëtarët: Fshihet kryesisht në gjene, jo në dietë apo ushtrime fizike

Nga ushtrimet e fizike te dietat strikte, shumë njerëz janë të gatshëm të provojnë gjithçka për të jetuar më gjatë. Megjithatë, një studim i ri thotë se çelësi i jetëgjatësisë mund të mos jetë stili i jetesës, por kryesisht gjenet tona.

Një kërkim i udhëhequr nga Universiteti i Kopenhagenit ka zbuluar se ndikimi i gjenetikës në jetëgjatësi është shumë më i madh sesa besohej më parë. Deri tani, studimet vlerësonin se vetëm 10 deri në 30 për qind e jetëgjatësisë përcaktohej nga gjenet, ndërsa pjesa tjetër lidhej me sëmundjet, aksidentet dhe faktorët e stilit të jetës. Por sipas llogaritjeve të reja, rreth 55 për qind e jetëgjatësisë varet nga trashëgimia gjenetike.

Autorët e studimit, Daniela Bakula dhe Morten Scheibye-Knudsen, theksojnë se nëse jetëgjatësia është kryesisht e përcaktuar nga gjenet, atëherë mundësitë për të ndikuar ndjeshëm në procesin e plakjes përmes stilit të jetesës janë të kufizuara.

Për të shmangur pasaktësitë e studimeve të vjetra, të cilat mbështeteshin në të dhëna historike me cilësi të ulët, studiuesit analizuan studime mbi binjakët. Ata zbuluan se kur vdekjet nga faktorë të jashtëm, si aksidentet apo sëmundjet infektive, janë më të rralla, roli i gjeneve në jetëgjatësi bëhet më i dukshëm.

Sipas ekspertëve, këto gjetje kanë rëndësi të madhe për të kuptuar procesin biologjik të plakjes dhe nxisin kërkime të mëtejshme mbi variantet gjenetike që lidhen me një jetë më të gjatë dhe më të shëndetshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)