10 mijë përfitues në total, Lamallari: Lirohen 338 të dënuar, ulje dënimi për 980 të tjerë

Amnistia penale pritet të marrë dritën jeshile nga qeveria për t’u depozituar në Kuvend. Ministria e Drejtësisë ka përgatitur projektligjin për amnistinë penale, i cili parashikon lirimin e menjëhershëm të 338 të dënuarve dhe ulje dënimi për 980 të tjerë.

Në një konferencë për shtyp, ministri i Drejtësisë, Besfort Lamallari, bëri të ditur se numri total i përfituesve arrin rreth 10 mijë persona, duke përfshirë edhe procedimet e vitit 2024.
“Amnistia penale është dërguar në Këshillin e Ministrave dhe pritet miratimi për ta depozituar në Kuvend. Nga shifrat paraprake, 338 persona përfitojnë lirim të menjëhershëm, ndërsa 980 të tjerë ulje dënimi”, deklaroi Lamallari.

Ai theksoi se ky akt ka një dimension të fortë human dhe synon ndryshimin e qasjes ndaj drejtësisë penale.

“Kemi një kategori të lartë personash nga grupet vulnerabël, përfshirë gra dhe të mitur. Duhet të orientohemi drejt rehabilitimit dhe t’u japim një mundësi të dytë. Arresti me burg duhet të jetë arma e fundit”, u shpreh ministri.

Lamallari sqaroi se nga amnistia përjashtohen personat në hetim apo gjykim nga SPAK dhe GJKKO.

“Nuk përfshihen persona nën hetim ose gjykim nga GJKKO. Është e rëndësishme të mos krijojmë spekulime dhe të ruajmë mbështetjen për organet e reja të drejtësisë”, theksoi ai.

Duke komentuar gjendjen në burgje, ministri pranoi se numri i të paraburgosurve në pritje të vendimit është shqetësues.

“Raporti që mora ishte shokues. Një i paraburgosur është potencialisht i pafajshëm dhe nuk duhet që prezumimi i pafajësisë të mbetet vetëm në Kushtetutë”, tha Lamallari.

Projektligji pritet të diskutohet në Kuvend në javët në vijim, në një klimë të tensionuar politike dhe institucionale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)