Domatja është frut apo perime?

Domatja është një nga ushqimet që shpesh ngre pyetjen klasike, a është frut apo perime? Edhe pse në përditshmëri konsiderohet perime, nga pikëpamja botanike ajo klasifikohet si frut.

Në botanikë, fruti është pjesa e pjekur e bimës që formohet nga lulja dhe përmban fara. Sipas këtij përkufizimi, domatja, njësoj si kungulli apo pjepri, bën pjesë te frutat. Megjithatë, në ushqim dhe kulinari përdoren kritere të tjera klasifikimi, raportojnë ekspertët e Britannica.

Nutricionistët zakonisht e përdorin termin “frut” për produkte të ëmbla dhe të pasura me fruktozë, ndërsa “perime” për pjesë të ndryshme të bimëve që nuk janë të ëmbla, si rrënjët, kërcelli, gjethet apo sythat. Në këtë kategori përfshihen në praktikë edhe disa fruta botanike, si bishtajat, kungulli dhe domatja.

Një tjetër arsye pse domatja konsiderohet perime në kuzhinë është mënyra e përdorimit: ajo shërbehet zakonisht si pjesë e pjatave kryesore ose si garniturë, jo si ëmbëlsirë. Për këtë arsye, klasifikimi kulinar si perime shihet si plotësisht logjik.

Nga Amerika Qendrore në tryezat e botës

Domatja ka origjinën nga Amerika Qendrore dhe u soll në Evropë pas zbulimeve gjeografike. Në fillim ekzistonte frika se ishte helmuese, gjë që vonoi përdorimin e saj në gastronomi. Vetëm pasi u provua se ishte e sigurt për konsum, ajo u përhap me shpejtësi dhe u bë pjesë thelbësore e kuzhinave në mbarë botën, veçanërisht në rajonin mesdhetar.

Sot, domatja konsiderohet një nga përbërësit që i dha identitetin karakteristik shumë gatimeve tradicionale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)