Ish-Presidentja e Kosovës mohon çdo lidhje me dosjen “Epstein”: Raportimet janë të pabaza dhe të pavërteta

Ish-presidentja e Kosovës, Atifete Jahjaga, ka reaguar publikisht ndaj raportimeve mediatike që e lidhin emrin e saj me dosjen e Jeffrey Epstein, duke i quajtur ato tërësisht të pavërteta dhe mashtruese për opinionin publik.

Përmes një postimi në Facebook, Jahjaga ka sqaruar se gjatë gjithë kohës sa ka ushtruar detyrën si Presidente e Republikës së Kosovës, nuk ka pasur asnjë njohje, takim apo çfarëdo lloj kontakti me personin në fjalë.

“Sqarim publik! Raportimet mediatike për ‘lidhjen time’ me dosjen ‘Epstein’ janë tërësisht të pabaza dhe të pavërteta. Si Presidente e Republikës së Kosovës nuk kam pasur asnjëherë njohje, takim apo çfarëdo lloj kontakti me personin në fjalë”, ka shkruar Jahjaga.

Ajo thekson se përmendja e emrit të saj në disa media lidhet vetëm me një korrespondencë elektronike mes palëve të treta, e cila, sipas saj, nuk dëshmon asnjë lloj lidhjeje personale apo institucionale me të.

“Përmendja e emrit tim lidhet vetëm me një korrespondencë elektronike të palëve të treta, e cila nuk përbën dhe nuk dëshmon asnjë takim, njohje apo lidhje personale me mua. Emri im askund nuk përmendet në asnjë dokument zyrtar të publikuar”, ka shtuar ish-presidentja.

Jahjaga sqaron më tej se në e-mailin në fjalë përmendet në mënyrë të paqartë “Presidenti i Kosovës”, pa u specifikuar se për cilin president bëhet fjalë dhe pa ndonjë kërkesë për takim në emër të saj.

“Në këtë e-mail përmendet Presidenti i Kosovës, por nuk është e qartë se cili dhe nuk përmendet asnjë kërkesë për takim në emër të tij apo të saj”, thekson ajo.

Duke i cilësuar raportimet ndryshe si insinuata dhe keqinformim të publikut, Jahjaga ka kërkuar që ky sqarim të publikohet nga të gjitha mediat që kanë përmendur emrin e saj.

“Çdo raportim ndryshe është insinuatë dhe mashtrim i opinionit publik. Kërkoj që ky sqarim të jepet në mediat që e kanë lakuar emrin tim, sidomos duke qenë se as nuk e kam njohur, as takuar dhe as kam kërkuar ndonjëherë takim me personin në fjalë, në asnjë pozitë që kam mbajtur”, ka përfunduar ajo.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)