Zbulohet “ferma e tmerrit”: Kafshë të keqtrajtuara dhe kufoma në dekompozim

Kafshë të uritura, të keqtrajtuara dhe në prag të vdekjes, si dhe rreth dyzet kufoma në dekompozim janë zbuluar në atë që është cilësuar si “ferma e tmerrit”. Situata tronditëse është regjistruar në zonat rurale të Italisë. Zbulimi u bë nga karabinierët pyjorë të Parmës, në bashkëpunim me personelin veterinar të shërbimit shëndetësor lokal.

Pronarja e fermës është kallëzuar për veprat penale të keqtrajtimit dhe vrasjes së kafshëve. Gjatë inspektimit, forcat e rendit dhe veterinerët konstatuan praninë e shumë kafshëve pa ushqim dhe pa ujë, ndërsa disa prej tyre nuk arrinin as të ecnin. Situata u përkeqësua më tej nga zbulimi i rreth 40 kufoma kafshësh në dekompozim, mes të cilave kishte gomarë, qen, dele, dhi, derra, zogj dhe lepuj.

Në përfundim të kontrollit, ndaj pronares së fermës u bë kallëzim penal për keqtrajtim dhe vrasje të kafshëve, si dhe për mbajtjen e tyre në kushte të papërshtatshme për natyrën që kanë. Duke marrë parasysh gjendjen e rëndë dhe rrezikun për shëndetin e kafshëve, autoritetet urdhëruan sekuestrimin e tyre dhe transferimin në struktura të specializuara për trajtim dhe kujdes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)