Negociatat për presidentin e Kosovës, Kurti: Synojmë të shmangim zgjedhjet

Kryeministri i Kosovës, Albin Kurti bëri me dije se Lëvizja Vetëvendosje nuk ka një kandidat të veçantë për postin e Presidentit të Republikës.

Komentet ai i bëri pas takimit me kryetarin e Lidhjes Demokratike të Kosovës, Lumir Abdixhiku, në kuadër të konsultimeve me partitë parlamentare për procesin e zgjedhjes së kreut të shtetit.

Kurti theksoi se, deri më tani, as LDK-ja dhe as Partia Demokratike e Kosovës nuk kanë paraqitur një emër konkret për këtë post. Ai nënvizoi se synimi kryesor është shmangia e zgjedhjeve të parakohshme, duke arritur një konsensus të gjerë politik për një kandidat që mund të sigurojë mbështetjen e nevojshme në Kuvend.

Një ditë më parë, ai zhvilloi takim edhe me kreun e PDK-së, Bedri Hamza, i cili deklaroi se partia e tij nuk do të bëhet pengesë për proceset shtetërore, por kërkon që kandidati për president të përfaqësojë unitetin qytetar dhe të ketë mbështetje të gjerë politike.

Sipas Kushtetutës së Kosovës, Presidenti duhet të zgjidhet jo më vonë se 30 ditë para përfundimit të mandatit të presidentes aktuale, Vjosa Osmani, në të kundërt vendi shkon në zgjedhje të parakohshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)