Kosova vendos masa mbrojtëse për naftën

Ministrja në detyrë e Industrisë, Ndërmarrësisë dhe Tregtisë, Rozeta Hajdari, ka bërë të ditur se ka marrë vendim për caktimin e marzheve tregtare për produktet e naftës që përdoren për transport.

Sipas këtij vendimi, marzhi maksimale e lejuar për shitjen me shumicë është deri në 2 centë për litër, ndërsa për shitjen me pakicë deri në 12 centë për litër.

Hajdari ka theksuar se vendimi është marrë me qëllim të mbrojtjes së konsumatorëve dhe garantimit të konkurrencës së drejtë në tregun vendor të naftës. Ajo ka sqaruar se masa vjen si rezultat i mbikëqyrjes së vazhdueshme të tregut, bazuar në të dhënat e përditshme të Doganës së Kosovës dhe raportet e Inspektoratit Qendror të Mbikëqyrjes së Tregut.

Sipas ministres, nga këto të dhëna është evidentuar se rritjet e çmimeve të importit reflektohen menjëherë në çmimet e shitjes, ndërsa uljet e çmimeve furnizuese nuk pasqyrohen proporcionalisht në tregun e brendshëm.

Vendimi do të hyjë në fuqi pas publikimit në Gazetën Zyrtare të Republikës së Kosovës. Po ashtu, është paralajmëruar rritje e inspektimeve nga Inspektorati i Tregut për të siguruar zbatimin e plotë të masës.

Aktualisht, çmimi i naftës me pakicë në Kosovë sillet rreth 1.25 euro për litër.

Qeveria e Kosovës ka vendosur edhe më herët masa mbrojtëse për produktet e naftës. Një vendim i ngjashëm ishte marrë në vitin 2023, por ishte kundërshtuar nga përfaqësuesit e sektorit të naftës, të cilët kishin deklaruar se masa ishte bazuar në raste të izoluara të abuzimit dhe se po dëmtonte gjithë sektorin. Edhe në vitin 2022, Qeveria kishte vendosur çmime tavan për shitjen me shumicë dhe pakicë të produkteve të naftës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)