Arrestohet në Turqi aktori Can Yaman e Selen Görgüzel

Aktori i njohur në Turqi, Can Yaman, me origjinë të largët shqiptare, është arrestuar në Stamboll në kuadër të një operacioni të gjerë policor kundër trafikut dhe konsumit të drogës në jetën e natës. Sipas mediave turke, arrestimi i tij erdhi pas një informacioni të marrë nga hetuesit, i cili çoi në kontrolle të befasishme në disa klube nate të qytetit.

Operacioni u zhvillua gjatë natës, kur policia bastisi nëntë lokale nate në zona të njohura të Stambollit, përfshirë Etiler dhe Beşiktaş. Gjatë aksionit u arrestuan shpërndarës droge, pronarë lokalesh si edhe disa persona të njohur në publik. Në total, shtatë VIP-a turq janë ndaluar nga autoritetet.

Përveç Can Yaman, mes të arrestuarve është edhe këngëtarja dhe aktorja Selen Görgüzel. Po ashtu, janë ndaluar modelja Ceren Alper, sipërmarrësja Ayşe Sağlam, këngëtari pop Berkay Şahin, këngëtari dhe influenceri Yusuf Aktaş, si dhe biznesmeni Sadettin Saran, i cili dyshohet për përfshirje në trafikim dhe prodhim të lëndëve narkotike.

Të gjithë të arrestuarit po i nënshtrohen testeve toksikologjike në Institutin e Mjekësisë Ligjore, për të përcaktuar llojin e substancave që dyshohet se kanë konsumuar. Hetimet vijojnë, ndërsa autoritetet turke paralajmërojnë masa të forta kundër drogës dhe rrjeteve kriminale në jetën e natës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)