Tatimet zbulojnë mbi 4 mijë ton mish të padeklaruar, subjekti në Tiranë 6.4 mln euro evazion fiskal

Në prag të mbrëmjes së ndërrimit të viteve, Administrata Tatimore ka zbuluar mbi 4 mijë ton mish të padeklaruar gjatë një kontrolli të ushtruar ndaj një subjekti të madh tregtar në Tiranë.

Po ashtu të njëjtit subjekt i janë zbuluar nga agjentët tatimorë rreth 9.3 milionë euro të ardhura të fshehura, ndaj është proceduar me kallëzimin penal në Prokurorinë e Tiranës.

Sipas Tatimeve, verifikimet e kryera nga Drejtoria e Tatimpaguesve të Mëdhenj evidentuan shkelje të rënda të legjislacionit tatimor, mospërputhje mes inventarit fizik dhe atij të deklaruar, si dhe një evazion fiskal të vlerësuar në rreth 6.4 milionë euro.

Rasti i është referuar Hetimit Tatimor dhe më pas Prokurorisë për ndjekje penale, ndërsa Administrata Tatimore thekson se do të vijojë pa kompromis përballjen me shkelësit e ligjit, përfshirë tatimpaguesit e mëdhenj.

Tatimet bëjnë me dije se aksioni synon jo vetëm luftën kundër evazionit fiskal, por edhe garantimin e sigurisë ushqimore dhe rritjen e formalizimit në tregun e produkteve blegtorale, duke paralajmëruar kontrolle të pandërprera edhe në vijim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)