E paralajmëroi Rama, Tatimet kalojnë “në sitë” ndërtuesit, kontrolle për nëndeklarim të pagave

Drejtoria e Përgjithshme e Tatimeve ka njoftuar se duke filluar nga 16 janari kanë nisur kontrollet në terren në sektorin e ndërtimit, me fokus verifikimin e nëndeklarimit të pagave dhe deklarimin real të profesioneve të punonjësve.

Kontrollet do të përqendrohen vetëm tek subjektet e vlerësuara me risk, të cilat nuk kanë respektuar pagat dysheme të përcaktuara nga Administrata Tatimore dhe nuk kanë reflektuar ndryshime në listëpagesa, pavarësisht njoftimeve elektronike të dërguara përmes sistemit e-Filing.

Tatimet do të krahasojnë pagat e deklaruara me pagat indikative sipas profesioneve, të publikuara në kanalet zyrtare. Çdo biznes që deklaron paga nën këto nivele, apo ndryshon profesionin e punonjësve për të shmangur detyrimet, do të konsiderohet me risk dhe do t’i nënshtrohet kontrolleve të specializuara.

Administrata Tatimore thekson se mosdeklarimi i punonjësve dhe nëndeklarimi i pagave janë shkelje të rënda që cenojnë pagesën e kontributeve shoqërore dhe pensionet, ndaj për subjektet problematike mund të ndërmerren kontrolle të thelluara dhe hetime, edhe në bashkëpunim me agjenci të tjera ligjzbatuese.

Nisjen e kontrolleve nga Tatimet në sektorin e ndërtimit e kishte paralajmëruar edhe kryeministri Edi Rama në disa dalje publike. Në një takim me sipërmarrës më 23 dhjetor, ku u diskutua Paqja Fiskale, Rama u bëri thirrje ndërtuesve që të deklarojnë pagat reale të punonjësve dhe i paralajmëroi se nuk ka paqe me ta sa i përket rigorozitetit në zbatimin e standardeve në ngritjen e strukturave të banimit.

Paqe me ndërtuesit nuk ka pikërisht se jeni sektor kryesor. Ça mbështetje doni ju? Ju më keni mbrapa këmba, këmbës. Mua dhe gjithë ata që varen nga unë. Dakord?! E para e punës, mbështetje ju që akoma deklaroni punonjës me 500 mijë lekë kur e dimë shumë mirë dhe ti dhe unë, dhe jam i bindur po të pyesim peshqit e Liqenit Artificial do na e konfirmojnë, që nuk ekzistojnë punonjës ndërtimi me 500 mijë lekë në ndërtim, jo në Tiranë po askund. Nuk të vjen të shtrojë as një pllakë në banjë robi për 500 mijë lekë. Nuk e keni fajin ju se na i ka lidhur duart Gjykata Kushtetuese para ca vitesh që nuk ju vendosim dot tavan dhe vazhdoni lozni ju. Jeni sektori me më shumë fitim në Shqipëri, jeni sektori ku shfrytëzohen punonjësit më shumë se në çdo sektor tjetër në Shqipëri. Dhe tani, pak si vonë e keni kuptuar që s’duhet tallur me punonjësit se ngelni pa ta. Tani shkundini mirë ato xhepa dhe paguajini punonjësit dhe 1500 dhe 2000 euro se do ngeleni dhe më keq. Ça mbështetje t’u japim ne juve. Bëni ato gjërat që keni për të bërë dhe jepuni njerëzve atë që ju takon dhe mos kërkoni fare, fare asgjë, zero. Kërkoni që vetëm të mos jeni në listën e zezë”, paralajmëroi Rama.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)