55 mijë euro për një masë sigurie, SPAK iu komunikon akuzat dy ish-prokurorëve

Prokuroria e Posaçme kundër Korrupsionit dhe Krimit të Organizuar (SPAK) ka nisur zyrtarisht komunikimin e akuzave ndaj dy ish-prokurorëve të Sarandës, Kledian Llaho dhe Çlirim Shahini. Llaho akuzohet për veprën penale të “korrupsionit”, ndërsa Shahini, i cili aktualisht ushtron profesionin e avokatit, për “ushtrim të ndikimit të paligjshëm”.

Sipas SPAK, dy ish-prokurorët dyshohet se janë përfshirë në një skemë korrupsioni për zbutjen e masës së sigurisë ndaj shtetasit Pando Papuçi, i cili ishte shpallur në kërkim për veprën penale të “ndërtimit pa leje”. Pas dy vitesh në arrati, Papuçi u arrestua dhe masa e sigurimit ndaj tij u ndryshua brenda një ore nga gjykata, me kërkesë të prokurorisë.

Hetimet tregojnë se Llaho dhe Shahini i kanë kërkuar Papuçit përfitime monetare në këmbim të ndërhyrjes në procedurat gjyqësore. Konkretisht, Llaho dyshohet se ka përfituar 30 mijë euro, ndërsa Shahini 25 mijë euro, duke e çuar shumën totale në 55 mijë euro për zbutjen e masës së sigurimit. Në këtë çështje është nën akuzë edhe biznesmeni Vasil Bakalli, i dyshuar si ndërmjetës.

Ndërkohë, Gjykata e Apelit ka vendosur se Papuçi nuk ka konsumuar vepër penale, duke hedhur poshtë akuzat fillestare dhe duke ngritur pikëpyetje mbi nisjen e procedimit penal.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)