SPAK kërkon kalimin në gjykim të dosjes ndaj Ilir Metës dhe Monika Kryemadhit

Prokuroria e Posaçme ka përfunduar leximin e aktakuzës në seancën paraprake ndaj ish-Presidentit Ilir Meta, ish-kryetares së LSI-së Monika Kryemadhi, si dhe Pirro Xhixhës, Ema Çokut dhe Fatime Kryemadhit.

Prokurori i çështjes, Sotir Kllapi, i kërkoi gjykatës paraprake që dosja të kalojë për gjykim në themel, ndërsa ndaj pesë të pandehurve rëndojnë akuzat për korrupsion dhe pastrim parash.

Gjatë seancës ka folur edhe Ilir Meta, ndërsa seanca u mbyll pas përfundimit të parashtrimeve të SPAK dhe seanca e radhës është caktuar të zhvillohet të enjten e 12 shkurtit, ku do të vendoset nëse çështja do të kalojë për gjykim në themel.

Foto: LSA

Pas daljes nga seanca, Monika Kryemadhi reagoi për mediat, duke kritikuar mënyrën se si, sipas saj, prokuroria ka paraqitur materialet hetimore. Ajo tha se relacioni i lexuar nga prokurori ishte kryesisht një përsëritje e vazhdueshme e të njëjtave elemente.

“Big Brother në versionin e SPAK-ut. Prokurori mbaroi relacionin dhe, për të thënë të drejtën, ishte përsëritje e të njëjtave gjëra disa herë, vetëm për të shtuar numrin e faqeve”, deklaroi Kryemadhi.

Ajo bëri të ditur se lista e provave iu dorëzua vetëm në fund të seancës dhe përbëhet nga mbi 40 faqe materiale, të cilat ajo nuk i konsideron prova ligjore.

“Në fund na u dorëzua lista e provave, rreth 40 e ca faqe, ku ka intervista, shkrime e gazeta. Për herë të parë, edhe në kohën e diktaturës këto nuk quheshin prova, por thirrej intervistuesi dhe merrej dëshmia në formën e provës”, u shpreh Kryemadhi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)