I riu në arrest shtëpie përplaset me policinë e Golemit, përfshihen dhe familjarë, raportohen të shtëna

Një incident është regjistruar mbrëmjen e sotme në zonën e Golemit, ku një 38-vjeçar që ndodhej me masë sigurie “arrest në shtëpi” është kapur nga policia duke lëvizur lirshëm dhe më pas është përfshirë në përplasje me efektivët.

Sipas burimeve, patrulla e Policisë së Golemit ka konstatuar në rrugë shtetasin me iniciale A. B., i cili ishte i shoqëruar nga disa persona të tjerë. Ai rezultonte me masë sigurie “arrest në shtëpi” për veprën penale “Shkatërrimi i pronës me zjarr”.

Efektivët e kanë ndaluar për verifikim dhe i kanë kërkuar shpjegime për shkeljen e masës së sigurisë, duke e njoftuar se do të shoqërohej në Komisariatin e Policisë për veprime të mëtejshme. Në këtë moment, situata është tensionuar.

38-vjeçari, së bashku me kunatin e tij, 23 vjeç, kanë kundërshtuar me forcë ndërhyrjen e policisë. Sipas të dhënave paraprake, në kundërshtim janë përfshirë edhe persona të tjerë, të afërm të tyre, duke e bërë situatën më të vështirë për efektivët në terren.

Për të shpërndarë turmën dhe për të neutralizuar përplasjen, një punonjës policie ka qëlluar një herë në ajër me armën e shërbimit. Pas mbërritjes së përforcimeve, personat e përfshirë janë shoqëruar në ambientet e komisariatit.

Në polici është dërguar edhe 38-vjeçari, për shkeljen e masës së sigurisë, ndërsa ndaj personave të tjerë pritet të merren masa për kundërshtim të punonjësve të policisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)