Berisha për lëvizjet e Salianjit dhe Alimehmetit: Takimet në kafe s’meritojnë komente

Kryetari i Partisë Demokratike, Sali Berisha, ka reaguar ndaj takimeve të fundit mes disa figurave të njohura të PD, duke i cilësuar ato si normale dhe pa asnjë arsye për shqetësim. Në një deklaratë për mediat, ai tha se “takimet në kafe nuk meritojnë komente”, duke theksuar se PD mbetet “partia më e hapur dhe demokratike në vend për çdo lloj mendimi”.

Berisha theksoi se procesi i analizës së brendshme në parti ka nisur dhe se udhëzimet janë shpërndarë, ndërsa shtoi se mediat po i japin jehonë këtyre takimeve për të “mbuluar superskandalet e Ramës dhe Lubonjës”.

Sipas tij, diversiteti i mendimit brenda PD është i natyrshëm dhe i pandashëm:
“Ka pasur, ka dhe do të ketë mendime të ndryshme sa kohë kjo mbetet Parti Demokratike”.

Duke komentuar rolin e figurave të përmendura, Berisha u shpreh se ata që kanë marrë më shumë vota tashmë janë në Parlament, ndërsa kandidatët e listave të hapura i vlerësoi si “njerëz të nderuar dhe kontributorë të rëndësishëm” të PD-së.

Ai përmendi veçanërisht Ervin Salianjin dhe Ilir Alimehmetin.

“Ervin Salianji është anëtar i Kryesisë së PD dhe ka instancat ku të shprehë mendimet e tij”, u shpreh Berisha.

“Alimehmeti është këshilltari i parë i opozitës në Tiranë dhe po ashtu ka vendin e tij për të folur”.

Në mbyllje, Berisha theksoi se dera e tij është e hapur për çdo demokrat:
“Unë pres çdo demokrat në zyrë. Të gjithë janë të ftuar të shprehin mendimet e tyre. Nuk ka asnjë risi këtu, të jem i sinqertë”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)