“Rama bëri grusht shteti”, akuzat e Berishës: Shfrytëzoi fatkeqësitë për të rehabilituar Ballukun

Nga mbledhja e Kryesisë së Partisë Demokratike, Sali Berisha, lëshoi akuza të forta ndaj kryeministrit Edi Rama dhe ministres së Infrastrukturës, Belinda Balluku, lidhur me rastet e fundit të korrupsionit dhe investimeve të dyshimta infrastrukturore.

Kreu i PD-së tha: “Ai de-facto ka kryer një grusht shteti, duke marrë pushtetin e parlamentit. Ai po mbron kërkesën për heqjen e imunitetit. Ai ka dëshmuar se Belinda Balluku është ai dhe Lubia është thjesht shërbëtore e tij e verbër. Shqiptarët tashmë e kanë të qartë”.

Berisha iu referua skandalit të tunelit të Llogarasë dhe ndarjes së Unazës së Madhe, duke theksuar se këto janë vendime të drejtuara nga kryeministri Rama, të cilat kanë kosto shtesë për qytetarët.

“Është autori i vërtetë i tunelit të Llogarasë, me një kosto 93 milionë euro më të madhe se sa ishte ofruar… Ndarja e 13 kilometrave të Unazës së Madhe në 14 lote, ku ka lote që kanë kushtuar 32 milionë euro, është totalisht urdhër dhe diktim i Ramës”, tha kreu i demokratëve.

Berisha akuzoi gjithashtu Ramën dhe Ballukun se, pasi vodhën miliona euro, shkojnë dhe ngushëllojnë qytetarët e prekur nga përmbytjet, duke e cilësuar këtë si një tentativë për rehabilitimin publik të Ballukut.

“Ky e dërgon për rehabilitim në fatkeqësi, bazuar në disa parime se në mortje pritet dhe armiku”, deklaroi Berisha, që mes të tjerave tha se vetëm një autokrat dhe diktator mund të lejojë raste të tilla si çështja “Balluku”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)