“Gjendja e qëndrueshme”, ish-presidenti Alfred Moisiu shtrohet me urgjencë në spital

Në Qendrën Spitalore Universitare “Nënë Tereza” ndodhet prej mesditës së kësaj të mërkure ish-Presidenti i Republikës, Alfred Moisiu. Ai është shtruar me urgjencë pas shfaqjes së problemeve me frymëmarrjen.

Menjëherë pas mbërritjes në spital, ish-kreu i shtetit është transferuar në repartin e Reanimacionit pranë Klinikës së Kardiologjisë, ku po mbahet nën monitorim të vazhdueshëm nga stafi mjekësor. Burime spitalore bëjnë me dije se parametrat jetësorë të ish-kreut të shtetit paraqiten të qëndrueshëm.

Mjekët po e ndjekin me kujdes gjendjen e tij shëndetësore, për të përcaktuar nëse në vijim do të jetë e nevojshme kryerja e një ndërhyrjeje. Nga QSUT theksohet se shërbimi i Kardiologjisë është në gatishmëri të plotë për të garantuar trajtimin e nevojshëm dhe mbikëqyrjen e vazhdueshme të gjendjes shëndetësore të Alfred Moisiut. Ai ka shërbyer si President i Republikës nga viti 2002 deri në vitin 2007.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)