E gjitha e zezë dhe debutim në fshehtësi, kjo është makina e re e Formula 1

Ka shumë pak, madje pothuajse aspak, siguri mbi debutimin në pistë të Audi R26. Makina e skuadrës më të re të Formula 1, preku për herë të parë asfaltin këtë të premte, më datë 9 janar, në Cirkuitin e Katalunjës në Spanjë.

Skuderia e re ka shfrytëzuar të parën nga dy ditët e provave, që secila nga dhjetë skuadrat e angazhuara në Botërorin e Formula 1, ka në dispozicion. Sipas “Auto Motor Sport”, njëvendëshja R26 - emërtim ende jo përfundimtar - doli në pistë për të zhvilluar xhirot e provës pak pas orës 10 të mëngjesit.

Sipas gjasave, drejtuesit e skuadrës pritën rritjen e temperaturave të asfaltit. Kushtet atmosferike ishin të mira, me qiell të kthjellët dhe temperaturë maksimale prej 13 gradësh në qytetin e afërt të Granollers. Makina u shfaq me një pamje të gjithën të zezë, pa elemente të dukshme dalluese, përveç logos së katër unazave të Audi-t në krahun e përparmë.

Foto nga web

Të dy pilotët e skuadrës, e cila ka zëvendësuar zyrtarisht Sauberin, Nico Hülkenberg dhe Gabriel Bortoleto, ishin të pranishëm në teste. Me shumë gjasa, xhirot e para i ka kryer piloti që ka më tepër përvojë, gjermani Hülkenberg. Prezantimi zyrtar i njëvendëshes është planifikuar për të martën, më 20 janar, në Berlin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)