Të gjithë duan Amerikën, 150 milionë kërkesa për Botërorin e futbollit

Presidenti i FIFA-s, Gianni Infantino, ka mbrojtur politikat e çmimeve të biletave për Kupën e Botës 2026, e cila do të zhvillohet në Shtetet e Bashkuara të Amerikës, Kanada dhe Meksikë, duke theksuar interesin e jashtëzakonshëm global për turneun.

Sipas Infantino-s, vetëm në dy javët e para janë regjistruar rreth 150 milionë kërkesa për bileta, një shifër që, sipas tij, dëshmon fuqinë dhe popullaritetin unik të Botërorit.

“Kërkesa është e jashtëzakonshme dhe kjo tregon se Kupa e Botës mbetet eventi sportiv më i madh në planet. Shtetet e Bashkuara kryesojnë listën e kërkesave, të ndjekura nga Gjermania dhe Mbretëria e Bashkuar”, u shpreh kreu i FIFA-s.

Infantino shtoi se organizimi i Botërorit 2026 pritet të gjenerojë rreth 10 miliardë euro të ardhura, shifër që do të përdoret, sipas tij, për zhvillimin e futbollit në mbarë botën, përfshirë investime në federata të vogla dhe projekte infrastrukturore.

Kupa e Botës 2026 do të jetë edicioni më i madh në histori, me 48 kombëtare pjesëmarrëse dhe ndeshje të zhvilluara në tre shtete, një format që FIFA beson se do ta çojë futbollin në një nivel edhe më global.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)