Ramadani ndaj Juventusin, bardhezinjtë ngecin pas 4 fitoreve radhazi

Juventusi u ndal në një barazim 1-1 përballë Lecce-s në “Allianz Stadium”, duke i dhënë fund serisë prej katër fitoresh radhazi në të gjitha garat dhe duke humbur një mundësi të artë për të vazhduar marshimin pozitiv në Serie A. Ndeshja u karakterizua nga dominimi i vendasve, por edhe nga mungesa e konkretizimit në momentet vendimtare.

“Zonja e Vjetër” e nisi takimin me intensitet të lartë, duke kontrolluar lojën dhe duke krijuar raste të njëpasnjëshme. Portieri i Lecce-s, Wladimiro Falcone, u shndërrua shpejt në protagonist absolut, duke ndalur dy tentativa të Andrea Cambiaso-s dhe një goditje me kokë të Jonathan David, e cila u ndal edhe nga shtylla.

Pavarësisht presionit të vazhdueshëm, ishte Lecce që gjeti golin e avantazhit në fundin e pjesës së parë. Një pasim i gabuar i Cambiaso-s u shfrytëzua nga Lameck Banda, i cili kaloi Bremer-in dhe dërgoi topin në rrjetë, duke befasuar vendasit.

Reagimi i Juventusit ishte i menjëhershëm. Vetëm katër minuta pas nisjes së pjesës së dytë, Kenan Yıldız asistoi për Weston McKennie-n, i cili nga afër barazoi rezultatin. Presioni i bardhezinjve vazhdoi dhe ata fituan edhe një penallti, por Jonathan David gaboi, duke u ndalur nga Falcone, hera e parë që kanadezi gabon nga pika e bardhë në nivel klubi që nga janari i vitit 2025.

Në minutat e fundit, Lecce u mbrojt dhe rezistoi ndaj përpjekjeve të Filip Kostić dhe sërish David. Barazimi i jep një pikë të vlefshme Lecce-s në luftën për mbijetesë. Ramadani u aktivizua gjatë gjithë takimit, duke qenë një nga më të mirët në fushë për miqtë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)