Gazetarja akuzon yllin e futbollit: Më ngjiti Covid-in, u kollit në fytyrën time

Gazetarja holandeze e sportit, Helene Hendricks ka ngritur akuza kundër futbollistit të njohur, ish-sulmuesit të Chelsea-t dhe Atletico Madrid, Diego Costa.

Incidenti për të cilin e akuzon ka të bëjë me një ndeshjeje të Ligës së Kampionëve midis Liverpool dhe Atletico Madrid në mars të vitit 2020, kur koronavirusi po përhapej me shpejtësi.

Pavarësisht se bota po hynte në pandemi, ndeshja u luajt në një stadium të tejmbushur me njerëz dhe më vonë u identifikua si një nga ngjarjet me numrin më të lartë të infeksioneve.

Hendricks ishte në fushë duke intervistuar lojtarë, përfshirë Costan, për të cilin ajo tani pretendon se u kollit qëllimisht në fytyrat e njerëzve, për t’iu transmetuar Covid-in.

"Nga të gjithë njerëzit që ishin në stadium, 41 vdiqën më vonë si pasojë e koronavirusit. Së pari isha në kontakt me Virgil van Dijk, dhe pastaj me Diego Costa. A e dini çfarë bëri ai? Ai u afrua dhe u kollit qëllimisht drejt e në fytyrat e njerëzve", zbuloi gazetarja në podkastin "HNM".

Ajo zbuloi më pas se kishte kryer një test dhe kishte rezultuar pozitive për virusin dy ditë më vonë.

"Nuk zemërohem aq lehtë, por në atë moment doja të vrapoja pas tij dhe ta pyesja: ‘Çfarë po më bën?’ Ai u kollit drejt e në fytyrën time. Nuk mund ta besoja çfarë po ndodhte, mendova se ishte absolutisht skandaloze", tha Hendricks.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)