Arrestohen teksa udhëtonin me 40 milionë dollarë, 35 milionë euro dhe 9 kg flori

Tensionet mes Ukrainës dhe Hungarisë kanë arritur një pikë të nxehtë pas arrestimit në Budapest të shtatë qytetarëve ukrainas, duke përfshirë edhe një ish-gjeneral të shërbimeve sekrete, si edhe ndalimin e dy automjeteve të blinduara. Ata udhëtonin me 40 milionë dollarë, 35 milionë euro dhe 9 kg flori.

Autoritetet doganore hungareze i akuzuan për pastrim parash, por qeveria ukrainase përmes ministrit të Jashtëm, Andriy Sybiha, foli për “banditizëm shtetëror”. Ai deklaroi se punonjësit e bankës shtetërore “Oschadbank” janë “mbajtur peng” gjatë një transferimi rutinë nga “Raiffeisen Austriake” drejt institucionit ukrainas.

Si pasojë e ngjarjes, qeveria ukrainase i këshilloi qytetarët e saj të shmangin udhëtimet drejt Hungarisë, duke paralajmëruar për “mosgarancinë e sigurisë për shkak të veprimeve arbitrare të autoriteteve lokale”. Budapesti reagoi duke dëbuar shtatë ukrainasit dhe shpërndau në rrjetet sociale pamje nga arrestimi i kryer nga njësia antiterror, si dhe fotografi të grumbujve të parave të sekuestruara, për të nënvizuar ekzistencën e asaj që ministri i Jashtëm Péter Szijjártó e quajti “mafia e luftës ukrainase”.

Kjo përplasje lidhet gjithashtu me ndërprerjen e furnizimeve të naftës ruse përmes tubacionit Druzhba, që shërben për Hungarinë dhe Sllovakinë. Presidenti Volodymyr Zelensky fajëson Rusinë për dëmtimet e infrastrukturës, por tregon ngurrim për riparimin e tranzitit. Kryeministri Viktor Orbán, që po bllokon paketën e ndihmës së BE-së për Ukrainën dhe një set sanksionesh ndaj Moskës, paralajmëron përdorimin e çdo mjeti, përfshirë bllokimin e mallrave të rëndësishme për Kievin, për të rivendosur funksionimin e Druzhba.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)