Vendimi i diskutueshëm, shtatë vende bojkotojnë ceremoninë hapëse të Lojërave Paralimpike të Dimrit

Ceremonia hapëse e Lojërave Paralimpike të Dimrit “Milano-Cortina 2026” nisi sot në Arenën e Veronës, por mungesa e disa delegacioneve ka bërë që nata të duket e paplotë. Shtatë vende, mes të cilave Çekia, Estonia, Finlanda, Letonia, Lituania, Polonia dhe Ukraina kanë vendosur të bojkotojnë ceremoninë në shenjë proteste ndaj një vendimi të debatueshëm të Komitetit Paralimpik Ndërkombëtar.

Vendimi i IPC-së lejoi që gjashtë sportistë rusë dhe katër bjellorusë të marrin pjesë në ceremoni me flamurin e vendeve të tyre. Vendimi i këtij edicioni ndryshon nga Lojërat Olimpike të Dimrit, që u zhvilluan muajin e kaluar, ku sportistët e këtyre vendeve u detyruan të konkurrojnë me flamur neutral. Kjo ka ngjallur zemërim, duke marrë parasysh pushtimin rus dhe bjellorus në territorin ukrainas dhe sulmet që kanë shkaktuar mbi 56,000 viktima civile që nga fillimi i luftës në vitin 2022.

Edhe disa vende të tjera, duke përfshirë Britaninë e Madhe, nuk i dërguan sportistët e tyre në ceremoninë hapëse, pavarësisht se nuk kanë bërë deklarata të drejtpërdrejta lidhur me pjesëmarrjen ruse. Sipas vlerësimeve, më pak se 60% e vendeve pjesëmarrëse dërguan delegacionin e plotë për këtë vit.

Presidenti i Komitetit Paralimpik Ndërkombëtar, Andreë Parsons e mbrojti vendimin, duke theksuar se fokusi i organit që drejton është të zhvillojë Lojërat dhe të promovojë “ndryshimin social për 1,3 miliardë persona me aftësi të kufizuara në botë”. Parsons theksoi gjithashtu se ky vendim është rezultat i procesit demokratik brenda organizatës dhe votimeve të anëtarëve të saj gjatë viteve 2022, 2023 dhe 2025, ku pezullimi i sportistëve është ndryshuar gradualisht.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)