Tifozët “përgënjeshtrojnë” FIFA-n, bie ndjeshëm çmimi i biletave të Botërorit 2026

Çmimet e biletave për Kupën e Botës po pësojnë rënie të fortë në tregun e rishitjes, teksa organizatorët po përballen me interes më të ulët se sa pritej për turneun më të madh sportiv të vitit, që nis më 11 qershor në Shtetet e Bashkuara, Kanada dhe Meksikë. Sipas të dhënave të publikuara nga “Ticketdata.com”, biletat për disa nga ndeshjet më të pritura të fazës së parë kanë rënë me mbi 30% vetëm gjatë muajit të fundit.

Mes tyre është edhe ndeshja hapëse e Shteteve të Bashkuara ndaj Paraguait, e cila sipas raportimeve ka shënuar një ulje të ndjeshme të çmimit. Në përgjithësi, çmimet kanë rënë për pothuajse të gjitha ndeshjet që do të zhvillohen në SHBA, me një mesatare uljeje prej 24%, ndërsa në disa raste rënia ka shkuar edhe mbi 50%. Megjithëse presidenti i FIFA-s, Gianni Infantino e ka krahasuar interesin për këtë Botëror me “1000 vite Botërorë njëherësh”, ulja e vazhdueshme e çmimeve po shihet si sinjal i kërkesës së dobët.

Pse po bien çmimet?

Analistët thonë se një nga arsyet kryesore është se FIFA ka vendosur çmime shumë të larta që në fillim. Scott Friedman, drejtues i emisionit “Ticket Talk”, ka deklaruar se FIFA ka gabuar në parashikimin e kërkesës. “FIFA i vendosi biletat shumë shtrenjtë për të gjitha 104 ndeshjet. Një katastrofë totale dhe do të detyrohen t’i ulin ndjeshëm në 30 ditët e ardhshme”, u shpreh ai.

Madje, edhe presidenti amerikan Donald Trump i ka komentuar më herët çmimet e larta të biletave, duke thënë për “New York Post” se nuk do të paguante 1000 dollarë për ndeshjen SHBA - Paraguai. “Nuk do ta paguaja as unë, të jem i sinqertë”, kishte deklaruar Trump.

Ulje edhe në faqen zyrtare të FIFA-s

Përveç tregut të rishitjes, FIFA vijon të nxjerrë në shitje edhe kuota të fundit biletash në faqen zyrtare, ku sipas raportimeve ka ende mijëra bileta të disponueshme. Për shkak të sistemit dinamik të çmimeve, çmimet në platformën zyrtare kanë pësuar gjithashtu rënie. Për shembull, biletat e kategorisë 1 për ndeshjen SHBA - Paraguai kanë rënë nga 4,105 dollarë në 3,420 dollarë, ndërsa biletat e kategorisë 2 nga 2,330 në 2,135 dollarë.

Ndërkohë, “Ticketdata.com” raporton se biletat për ndeshjet e SHBA-së në grup ndaj Paraguait, Australisë dhe Turqisë kanë rënë të paktën me 30%, me rënien më të madhe në ndeshjen ndaj Turqisë, deri në 46%.

Foto ilustruese

Rënie drastike në disa ndeshje

Në ndeshje të tjera të turneut janë regjistruar ulje edhe më të thella. Për sfidën Australi - Turqi rënia është me 60%, për Irak - Norvegji me 54%, ndërsa për ndeshjen Paraguai - Turqi me 53%. Ekspertët theksojnë se rënia e çmimeve është normale kur eventi afrohet, por shkalla e kësaj uljeje tregon një hendek të madh mes çmimeve të vendosura dhe kërkesës reale të tifozëve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)