Shakira dhe Burna Boy publikojnë himnin zyrtar të Kupës së Botës

Shakira dhe Burna Boy kanë bashkuar forcat për të sjellë “Dai Dai”, këngën zyrtare të Kupës së Botës, që pritet të shoqërojë atmosferën e kampionatit më të madh të futbollit në botë.

Kënga ndërthur ritmet latine me tingujt modernë Afrobeats, duke krijuar një projekt muzikor global dhe shumëgjuhësh. Në tekst përmenden disa nga kombëtaret më të njohura të futbollit botëror, ndërsa Shakira këndon emra si Brazili, Uruguai, Argjentina, Kolumbia, Meksika, Japonia, Koreja dhe Holanda.

Pas refrenit të parë, dy artistët alternojnë vargjet e tyre përpara se të bashkohen në një duet energjik, që tashmë ka nisur të komentohet gjerësisht në rrjetet sociale.

Publikimi i “Dai Dai” vjen menjëherë pasi FIFA njoftoi se Shakira, Madonna dhe grupi koreano-jugor BTS do të jenë protagonistët e spektaklit historik të finales së Botërorit më 19 korrik në stadiumin MetLife në Nju Xhersi. Spektakli është kuruar nga Chris Martin i grupit Coldplay.

Koncerti i finales do të mbështesë fondin “FIFA Global Citizen Education Fund”, i cili synon të mbledhë 100 milionë dollarë për edukimin dhe zhvillimin sportiv të fëmijëve në mbarë botën.

Shakira rikthehet kështu sërish në historinë e himneve të Botërorit, pasi “Waka Waka” në vitin 2010 u kthye në një nga këngët më ikonike të futbollit ndërkombëtar.

Botërori 2026 do të organizohet nga Shtetet e Bashkuara, Kanadaja dhe Meksika gjatë muajve qershor dhe korrik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)