“Milano-Cortina 2026”, edhe hacker kërkojnë të marrin arin olimpik

Me afrimin e Olimpiadës Dimërore “Milano-Cortina 2026”, autoritetet italiane kanë vënë në zbatim masa të jashtëzakonshme për sigurinë kibernetike. Mbrojtja digjitale është cilësuar një element kyç për mbarëvajtjen e eventit. Autoritetet kanë marrë masat, për të vënë në funksion një sallë operative 24 orë në 24, e cila do të jetë e dedikuar për menaxhimin e incidenteve dhe sulmeve kibernetike.

Siguria kibernetike është pjesë e një strategjie më të gjerë teknologjike për menaxhimin e ngjarjeve të mëdha ndërkombëtare. Ajo përfshin forcimin e infrastrukturës së telekomunikacionit, duke nisur nga rrjetet me fibër optike dhe komunikimet celulare, veçanërisht të rrjetit 5G.

Gjithashtu do të instalohen sisteme inovative të vëzhgimit nga kamerat e sigurisë dhe do të përdoren dronë për transmetimet e drejtpërdrejta. “Gjatë Olimpiadës edhe hacker-at synojnë medaljen e artë”, shkruanin studiuesit e “Unit 42”, në raportin “Defending the 2026 Milano Cortina Winter Games”. Aty simulohen skenarët e mundshëm të sulmeve.

Raporti rikujtonte se gjatë Lojërave 2018 në PyeongChang u ndërprenë shërbimet “Wi-Fi”, në “Tokio 2020” pati tentativa sabotimi të aktiviteteve paraprake, ndërsa në “Paris 2024” u regjistrua një rritje e ndjeshme e sulmeve “DDoS” si edhe mashtrimeve online me temë olimpike.

“Është e qartë se jo vetëm impiantet sportive, por edhe infrastrukturat, selitë dhe furnitorët lokalë bëhen pjesë e rrezikut së gjerë të sulmeve kibernetike gjatë Olimpiadës”, theksojnë ekspertët. Me mbi 3 miliardë shikues në mbarë botën, rreziku është shumë i lartë veçanërisht për infrastrukturat kritike: shërbimet publike, energjinë, ujin, transportin publik dhe hekurudhor, si dhe sistemet e pagesave digjitale, biletarinë dhe faqet zyrtare të eventit.

Sipas studiuesve, inteligjenca artificiale, fatkeqësisht, po ndihmon hacker-at të identifikojnë më shpejt pikat e dobëta dhe rrugët më të lehta të aksesit në sistemet mbrojtëse. Këtu nuk përjashtohen as faktorët gjeopolitikë, ku aktorë të veçantë mund të tentojnë të sulmojnë infrastrukturat digjitale për të përhapur panik dhe dezinformim, duke shfrytëzuar audiencën globale të Lojërave Olimpike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)