Dhuna godet Meksikën pas vrasjes së lordit të drogës, ekzekutohen 25 trupa të gardës

Dhuna ka përfshirë Meksikën, të paktën në 20 shtete, pas vrasjes së bosit të drogës Nemesio Rubén Oseguera Cervantes, i njohur si “El Mencho”.

Foto: AP/Marco Ugarte

Një valë e madhe dhune ka përfshirë Meksikën pas vrasjes së Nemesio Rubén Oseguera Cervantes, i njohur si “El Mencho”, kreu i fuqishëm i Kartelit të Gjeneratës së Re të Jaliskos.

Bosi i drogës, një nga më të kërkuarit nga autoritetet meksikane dhe amerikane u vra një ditë më parë gjatë një operacioni të ushtrisë meksikane në qytetin Tapalpa, në shtetin perëndimor të Jaliskos.

Informacioni i ofruar nga SHBA ndihmoi në lokalizimin e tij, megjithëse forcat meksikane kryen operacionin në mënyrë të pavarur. Gjatë sulmit, Oseguera dhe disa anëtarë të kartelit u plagosën rëndë dhe vdiqën gjatë transportit për në Ciudad de México.

Reagimi i kartelit ishte i shpejtë dhe i dhunshëm. Pas përhapjes së lajmit për vdekjen e tij, anëtarët e bandës nisën sulme të koordinuara në të paktën 20 shtete, duke djegur autobusë dhe makina, duke bllokuar rrugët me pengesa dhe sulmuar forcat e sigurisë.

Rrugët në qytete të mëdha, përfshirë Guadalajara dhe Puerto Vallarta, mbetën pothuajse të zbrazëta, ndërsa banorët u fshehën në shtëpi për shkak të kaosit dhe tymit.

Forcat e sigurisë meksikane pësuan humbje të mëdha: të paktën 25 anëtarë të Gardës Kombëtare u vranë nga sulmet në Jalisko, sipas sekretarit të sigurisë. Përveç personelit të sigurisë, gjatë përleshjeve vdiqën edhe anëtarë të kartelit dhe të paktën një civil, ndërsa dhjetëra persona u arrestuan.

Si përgjigje ndaj dhunës në rritje, autoritetet dërguan mijëra ushtarë shtesë dhe forcuan masat e sigurisë në rajonet e prekura. Shkollat, transporti publik dhe bizneset u mbyllën në disa shtete për shkak të kërcënimeve.

huna ka ngritur frikën për destabilizim të mëtejshëm, ndërsa grupet kriminale rivale mund të konkurrojnë për territoret e CJNG-së pas vdekjes së liderit të tij.