Rregulli i ri që ushtarët amerikanë duhet të zbatojnë në të kundërt përjashtohen

Ushtria e Shteteve të Bashkuara ka vendosur një standard të ri për rregullat e paraqitjes personale, duke kufizuar në një periudhë maksimale prej 12 muajsh përjashtimin mjekësor që u lejon ushtarëve të mos rruhen. Ky ndryshim mund të sjellë pasoja të drejtpërdrejta për mijëra efektivë që përballen me probleme të lëkurës.

Sipas politikës së përditësuar nga Zyra e Çështjeve Publike të Ushtrisë, të gjithë ushtarët duhet të jenë “të rruar mirë” gjatë shërbimit, si në uniformë ashtu edhe në veshje civile. Përjashtimet lejohen vetëm për arsye mjekësore ose fetare, por ndryshe nga më parë, ato nuk do të jenë më të përhershme.

Rregulli i ri parashikon që ushtarët, të cilëve gjendja mjekësore u pengon të respektojnë standardet e paraqitjes për më shumë se një vit, mund të përballen me largim nga shërbimi. Kjo prek veçanërisht ata që vuajnë nga pseudofolikuliti, një inflamacion kronik i lëkurës i shkaktuar nga qimet e futura nën lëkurë pas rruajtjes.

Sipas të dhënave të Kolegjit Amerikan të Dermatologjisë Osteopatike, kjo gjendje prek rreth 60% të meshkujve me ngjyrë dhe personat me flokë kaçurrela. Për këtë arsye, ndryshimi i politikës mund të ndikojë më shumë tek ushtarët afroamerikanë.

Në dokumentin zyrtar të Marinës amerikane, thuhet se “pas 12 muajsh trajtim të vazhdueshëm, komandantët do të vlerësojnë nëse ushtari mund të vazhdojë shërbimin dhe mund të nisin procedurat e ndarjes nëse gjendja nuk është përmirësuar”.

Sipas zëdhënësve të Ushtrisë, rreth 40 mijë ushtarë aktualisht përfitojnë nga përjashtimi mjekësor. Megjithatë, ata theksojnë se problemet lidhen shpesh me teknikat e pasakta të rruajtjes dhe janë më të zakonshme tek ushtarët e rinj.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)