Rekord që nga viti 1959, Franca nën ujë pas 35 ditësh reshje të pandërprera

Me 35 ditë radhazi reshje shiu, Franca ka regjistruar periudhën më të gjatë të reshjeve që nga fillimi i matjeve në vitin 1959, duke thyer rekordin e mëparshëm të vendosur në vitin 2023. Lajmi u bë i ditur nga “Météo-France”, sipas së cilës nga 14 janari deri më 17 shkurt reshjet e akumuluara kanë shkaktuar përmbytje në disa zona të vendit.

Sipas parashikimeve, situata mund të përkeqësohet, pasi priten reshje të tjera në ditët në vijim. Qyteti i Bordeaux ka aktivizuar planin e emergjencës për përmbytjet. Për herë të parë që nga stuhia e vitit 1999, kryebashkiaku Pierre Hurmic shpalli gjendjen e alarmit të kuq. Autoritetet paralajmëruan rritje të nivelit të ujit gjatë baticës së mëngjesit, veçanërisht në zonat e Libourne dhe Bordeaux.

Sipas shërbimit francez të monitorimit të përmbytjeve, “Vigicrues”, priten përmbytje “shumë domethënëse” duke përfshirë zona që rrallëherë janë prekur më parë. Tre persona po kalonin lumin Loire kur mjeti i tyre lundrues u përmbys. Dy prej tyre u shpëtuan, ndërsa një i tretë rezulton ende i zhdukur. Autoritetet paralajmërojnë se gjasat për ta gjetur janë të ulëta për shkak të rrjedhës së fortë dhe gjerësisë së lumit.

Katër departamente: Charente-Maritime, Gironde, Lot-et-Garonne dhe Maine-et-Loire janë vendosur nën alarm të kuq për përmbytje, të paktën deri të enjten. Ndërkohë, dhjetë departamente të tjera janë në alarm portokalli për reshje intensive dhe përmbytje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)