Europa po ‘digjet’, kupola termike shkakton valë vdekjeprurëse të nxehti nga Britania në Francë

Europa po “digjet”. Një valë e pazakontë e të nxehtit ka mbërthyer kontinentin e vjetër, me temperatura të papara që po regjistrohen kryesisht në shtetet veriore dhe qëndrore, ndërsa vala e të nxehtit është përgjegjëse edhe për vdekjet e para të sezonit të verës.

Në disa pjesë të Evropës, temperatura ka arritur në 10 deri në 15 gradë Celsius mbi mesataren për këtë kohë të vitit, ndërsa java që u mbyll e futi kontinentin në... furrë.

Kupola termike, që është një sistem i vazhdueshëm me presion të lartë që vepron si një kapak, duke bllokuar ajrin e ngrohtë dhe duke e shtyrë atë drejt tokës ka shkaktuar të nxehtin e pazakontë në Europë.

Mbretëria e Bashkuar vendosi të martën një rekord të ri me termometrin që shënoi 35.1 gradë Celsius në Kopshtet Keë të Londrës. Temperatura theu rekordin e vendosur vetëm një ditë më parë, kur në Londër u regjistruan 34.8 gradë Celsius. Rekordi i mëparshëm ishte vendosur në maj të vitit 1922 dhe ishte 32.8 gradë Celsius.

Irlanda gjithashtu theu rekordin e vet me temperaturën maksimale për majin që arriti në 28.8 gradë Celsius.

Vlen të përmendet se përveç temperaturave maksimale gjatë ditës, temperaturat historike shënohen edhe gjatë orëve të natës. Natën e së martës, temperatura në Camborne në Anglinë jugperëndimore ra në vetëm 21.4 gradë Celsius, duke shënuar një natë veçanërisht të ngrohtë dhe tropikale.

Vala e të nxehtit që ka përfshirë Evropën përshkruhet si "e paprecedentë" me viktimat e para të regjistruara tashmë. Konkretisht, Franca numëron tashmë shtatë vdekje të lidhura me të nxehtin, qoftë drejtpërdrejt ose tërthorazi, teksa temperaturat në Francën jugore arritën 40 gradë Celsius.

Katër qytete italiane janë vënë në alarm të kuq për shkak të temperaturave të larta. Ministria e Shëndetësisë ka vënë në alarm të kuq Romën, Firencen, Bolonjën dhe Torinon, me autoritetet që paralajmërojnë se kushtet paraqesin kërcënim jo vetëm për grupet vulnerabël, por edhe për qytetarët e shëndetshëm.

Dhe Spanja regjistroi temperatura jashtëzakonisht të larta për sezonin, sipas agjencisë meteorologjike AEMET, me temperatura në pjesë të vendit, të tilla si Bilbao, në rajonin Bask, që arritën mbi 40 gradë.

Në ditët në vijim temperaturat pritet të vazhdojnë të mbeten të larta, konkretisht rreth 5 deri në 10 gradë Celsius mbi mesataren. Pas përfundimit të javës së ardhshme, situata pritet të ndryshojë dhe termometri do të fillojë të tregojë temperatura më të ulëta.

Sipas shkencëtarëve, nxehtësia ekstreme e regjistruar ditët e fundit është një nga shenjat më të qarta të krizës klimatike. Gazrat serrë që vijnë nga djegia e lëndëve djegëse fosile veprojnë si një "batanije" rreth Tokës, duke rritur gradualisht temperaturën e planetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)