Berisha nga Kuvendi Kombëtar: Rama dështoi ta asgjësojë PD-në, do ta përmbysim “diktaturën"

Pas rizgjedhjes në krye të Partisë Demokratike, Sali Berisha mblodhi Kuvendin Kombëtar, në një takim ku dominuan mesazhet politike kundër qeverisë dhe kryeministrit Edi Rama. Në fjalën e tij, kreu i demokratëve akuzoi Ramën për përpjekje të vazhdueshme për të dobësuar opozitën dhe për ta shndërruar PD-në në një forcë fasadë, ndërsa deklaroi se beteja e radhës do të jetë rrëzimi i asaj që e cilësoi si një regjim autokratik.

Berisha tha se Partia Demokratike ka kaluar një nga periudhat më të vështira të historisë së saj, por sipas tij ka arritur të mbijetojë falë qëndresës së anëtarëve dhe mbështetësve.

“E dija që kishim rrugë të vështirë dhe se na prisnin beteja të egra. Në karrierën time politike dhe në jetë kam bërë gabime. Kam pasur një avantazh të madh që nga vitet e rinisë e deri më sot: kam ruajtur bindjen se jashtë teorisë së gabimit askush nuk del. Prandaj jam përpjekur gjithmonë t’i korrigjoj ato. Por dua t’ju them sot se në një gjë nuk kam gabuar kurrë: në besimin ndaj jush. Nuk kam vendosur asnjëherë në dyshim besimin tek ju, karakterin tuaj, idealet dhe përkushtimin tuaj”, u shpreh Berisha.

Duke iu referuar përplasjes së gjatë për drejtimin dhe simbolet e Partisë Demokratike, ai akuzoi kryeministrin Rama se kishte ndërmarrë një ofensivë politike për të asgjësuar opozitën.

“Erdhi një moment kur Edi Rama vendosi si moral dhe platformë të regjimit të tij moralin dhe platformën e etërve të tij xhelatë. Ai ndërmori sulmin për asgjësimin e Partisë Demokratike, për shndërrimin e saj në një opozitë fasadë, për blerjen e saj. Por gaboi. Kjo parti nuk është për treg. Kjo parti është për ideale dhe vlera. As nuk blihet, as nuk shitet dhe as nuk mposhtet kurrë”, deklaroi kreu i PD-së.

Berisha shtoi se demokratët vendosën të rezistojnë edhe në momentet kur, sipas tij, gjithçka dukej kundër tyre.

“U ngritëm në një kohë kur dukej se edhe tokën edhe qiellin i kishim kundër nesh. Na e imponuan këtë betejë. Midis të gjithave, ne zgjodhëm të mbrojmë të vërtetën. Ju jeni gardianë të pluralizmit politik, gardianë të pamposhtur të lirisë dhe dinjitetit njerëzor”, tha ai.

Në vijim të fjalës së tij, Berisha hodhi akuza të forta ndaj qeverisë, duke pretenduar se janë përdorur të gjitha mjetet për të dobësuar opozitën.

“Sipas tij, ‘narkodiktatori bëri gjithçka për të eliminuar Partinë Demokratike. I mori vulën, i hoqi emrin, i preu financimet dhe e izoloi përkohësisht nga bota. Më pas vazhdoi betejën i mbështetur nga mafia elektorale. Në vit elektoral arrestoi liderët e partive kryesore opozitare’”, deklaroi Berisha para delegatëve.

Kreu i demokratëve përdori gjithashtu tone ironike ndaj kryeministrit Edi Rama dhe zëvendëskryeministres Belinda Balluku, teksa foli për objektivat politikë të opozitës.

“Tridhjetë e pesë vite më parë përmbysëm diktaturën më oruelliane të Europës. Tani do të përmbysim diktaturën e Edvin Ballukut, diktaturën më të shëmtuar mes diktaturave autokratike”, tha Berisha.

Në mbyllje të fjalës së tij, ai përsëriti se Partia Demokratike do të vazhdojë betejën politike kundër qeverisë, duke theksuar se forca që ai drejton mbetet e lidhur me vlerat dhe parimet mbi të cilat është themeluar.

“Kjo parti është për vlera. Nuk shitet dhe nuk blihet. Sa herë rrëzohemi, ngrihemi përsëri”, përfundoi Berisha.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)