“Burrat merren direkt nga puna”, mobilizim masiv ushtarak në Bjellorusi

Raportime të shumta nga qyteti i Grodno dhe zona të tjera perëndimore të Bjellorusisë flasin për lëshimin e fletë-thirrjeve ushtarake në numër të madh dhe për burra që “merren direkt nga puna”. Sipas dëshmive të publikuara në rrjetet sociale nga gra të zonës, burrat po dërgohen në ushtri për periudha nga një muaj e gjysmë deri në dy muaj, pa pasur kohë të sistemojnë çështje personale apo familjare.

“Nuk e lanë as të marrë fëmijën nga kopshti”, citohet të ketë thënë një grua me emrin Maria. Sipas të njëjtave burime, edhe baballarë me disa fëmijë po thirren dhe largohen brenda ditës, shpesh pa njoftim paraprak. Familjarët pretendojnë se telefonat e tyre konfiskohen dhe komunikimi ndërpritet, çka ka shkaktuar panik dhe reagime të shumta online.

Shqetësimi rritet për shkak të vendndodhjes gjeografike: bëhet fjalë për rajonin e Grodnos, një zonë strategjike mes Bjellorusisë dhe rajonit rus të Kaliningrad-it. Zyrtarisht, autoritetet bjelloruse e kanë përshkruar situatën si një kontroll të gatishmërisë luftarake dhe si përgjigje ndaj asaj që e quajnë “retorikë agresive të Perëndimit”. Megjithatë, intensiteti i thirrjeve dhe mënyra e zbatimit të tyre kanë ngritur pikëpyetje dhe pasiguri mes popullsisë.

Foto nga web

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)