Tragjedi në Alaskë, tre alpinistë humbin jetën në malin më të lartë të Amerikës së Veriut

Një ekspeditë alpinizmi nga Letonia është përfshirë nga një tragjedi në Alaskë, ku tre alpinistë humbën jetën pas një rënieje pranë një prej zonave më të rrezikshme të malit Mekinli, ndërsa një anëtar i katërt i ekipit arriti të mbijetojë dhe u shpëtua nga ekipet e emergjencës.

Sipas autoriteteve amerikane dhe grupit letonez të alpinizmit, aksidenti ndodhi gjatë ngjitjes drejt majës së Denalit, mali më i lartë në Amerikën e Veriut me një lartësi prej rreth 6.190 metrash. Alpinistët ishin pjesë e një ekspedite prej shtatë personash që po kalonte nëpër itinerarin West Buttress, një nga rrugët më të njohura, por edhe më sfiduese të ngjitjes.

Alpinisti i mbijetuar u nxor nga mali me helikopter nga një lartësi prej rreth 5.240 metrash dhe më pas u transportua në spital për trajtim mjekësor. Ndërkohë, tre anëtarë të tjerë të ekipit, të cilët morën pjesë në përpjekjet e shpëtimit, u evakuuan pasi shfaqën probleme fizike për shkak të kushteve ekstreme.

Mali Denali njihet për motin e ashpër, temperaturat e ulëta dhe ndryshimet e menjëhershme atmosferike që e bëjnë ngjitjen veçanërisht të rrezikshme. Kalimi Denali, në një lartësi prej rreth 5.550 metrash, konsiderohet një nga segmentet më të rrezikshme të itinerarit, ku gjatë viteve janë regjistruar dhjetëra aksidente fatale.

Sipas të dhënave zyrtare të parkut kombëtar, çdo vit rreth 1.000 deri në 1.200 alpinistë tentojnë të arrijnë majën e Denalit, por më pak se gjysma e tyre ia dalin me sukses.

Autoritetet amerikane bëjnë të ditur se deri më sot në këtë mal kanë humbur jetën më shumë se 130 persona, duke e renditur Denalin ndër destinacionet më të rrezikshme të alpinizmit në botë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)