Rrugorja ndëshkon me dhjetëra shoferë që drejtojnë mjetin nën efektin e alkoolit në Vlorë

Siguria rrugore ka qenë në fokus të kontrolleve të Policisë Rrugore të Vlorës gjatë fundjavës, ku dhjetëra drejtues mjetesh janë ndaluar dhe verifikuar në hyrje të qytetit në kuadër të masave për parandalimin e aksidenteve.

Aksioni u përqendrua kryesisht në evidentimin e shoferëve që drejtojnë automjetet nën efektin e alkoolit, si dhe të atyre që nuk respektojnë detyrimin për vendosjen e rripit të sigurimit.

Sipas Policisë Rrugore, gjatë kontrolleve janë inspektuar dhjetëra automjete dhe janë vendosur masa administrative ndaj drejtuesve që kanë shkelur rregullat e qarkullimit rrugor. Nga verifikimet rezultoi se disa shoferë po drejtonin mjetet nën efektin e alkoolit, duke rrezikuar jo vetëm jetën e tyre, por edhe sigurinë e përdoruesve të tjerë të rrugës.

Autoritetet theksojnë se drejtimi i automjetit në gjendje të dehur mbetet një nga shkaqet kryesore të aksidenteve të rënda rrugore, ndaj kontrollet do të vijojnë me intensitet të lartë edhe gjatë javëve në vijim.

Policia Rrugore e Vlorës u ka bërë thirrje qytetarëve të respektojnë rregullat e qarkullimit, të mos ulen në timon pas konsumimit të alkoolit dhe të përdorin gjithmonë rripin e sigurimit.

Sipas uniformave blu, kontrollet parandaluese synojnë rritjen e sigurisë në rrugë dhe uljen e numrit të aksidenteve, veçanërisht gjatë sezonit veror kur fluksi i automjeteve në zonat bregdetare është më i lartë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)