“Tmerri i deteve”, Gjermania po ndërton luftanijen më të madhe në botë

Gjermania po zhvillon një nga projektet më ambicioze ushtarake detare, ndërtimin e fregatës së re F126, e cila pritet të jetë ndër më të mëdhatë në botë. Anija e parë e kësaj klase, “Niedersachsen”, është tashmë në ndërtim, por projekti po përballet me vonesa të konsiderueshme.

Fillimisht ishte planifikuar që luftanija të hynte në shërbim në vitin 2029, por sipas vlerësimeve të fundit, ajo mund të jetë gati vetëm në vitin 2031. Problemet kryesore lidhen me vështirësi teknike dhe organizative, sidomos në integrimin e sistemeve dhe të dhënave mes kompanive të përfshira në ndërtimin e saj.

Fregata F126 dallon nga anijet tradicionale për konceptin e saj fleksibël. Ajo është projektuar si një platformë shumëfunksionale, e cila mund të përshtatet për misione të ndryshme, si lufta kundër nëndetëseve, operacionet me dronë apo mbështetja e forcave speciale. Me një peshë rreth 10 mijë tonë, ajo do të ketë kapacitet për misione afatgjata dhe prezencë të vazhdueshme në det.

Ndërkohë, Berlini po shqyrton edhe alternativa më të shpejta, si fregatat MEKO A-200 (F128), për të mbuluar boshllëqet deri në përfundimin e projektit kryesor.

Problemet në F126 janë lidhur edhe me menaxhimin e projektit, ku kantieri holandez Damen u zëvendësua nga grupi gjerman NVL, ndërsa kompania Rheinmetall pritet të ndihmojë në përshpejtimin e punimeve.

Në të njëjtën kohë, gara për anije të mëdha luftarake po intensifikohet globalisht, pasi edhe SHBA ka paralajmëruar ndërtimin e një gjenerate të re luftanijesh të avancuara.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)