Prag epidemie, mbi 100 viktima nga fruthi në Bangladesh

Një valë e rrezikshme infektimesh nga fruthi ka përfshirë Bangladesh, duke shkaktuar mbi 100 viktima, shumica fëmijë, në atë që konsiderohet si një nga shpërthimet më të rënda të viteve të fundit.

Autoritetet shëndetësore raportojnë mbi 7500 raste të dyshuara që nga mesi i marsit, ndërsa më shumë se 900 janë konfirmuar zyrtarisht.

Përballë kësaj situate, vendi ka nisur një fushatë emergjente vaksinimi, me mbështetjen e UNICEF dhe Organizatës Botërore të Shëndetësisë. Qëllimi është imunizimi i mbi 1.2 milionë fëmijëve të moshës nga 6 muaj deri në pesë vjeç, veçanërisht atyre që nuk kanë bërë vaksinat e kalendarit.

Ekspertët theksojnë se shpërthimi lidhet me ndërprerjet në programet e vaksinimit gjatë viteve të fundit. Fushatat periodike nuk janë zhvilluar që nga viti 2020, fillimisht për shkak të pandemisë COVID-19 dhe më pas për shkak të krizave politike në vend. Këto vonesa kanë krijuar boshllëqe në mbrojtjen imunitare të popullsisë.

Një shqetësim i madh mbetet fakti që shumë nga të infektuarit janë foshnje nën moshën 9 muajsh, të cilët ende nuk përfshihen në skemat e vaksinimit rutinë. Sipas përfaqësuesve të UNICEF-it, kjo i bën ata veçanërisht të rrezikuar ndaj komplikacioneve të rënda.

Fushata aktuale do të përqendrohet në zonat më të prekura, përfshirë kryeqytetin Dhaka dhe rajonin e Cox's Bazar, ku ndodhen edhe kampet e refugjatëve Rohingya.

Autoritetet bëjnë thirrje për ndërgjegjësim dhe pjesëmarrje në vaksinim, duke theksuar se vetëm përmes imunizimit mund të frenohet përhapja e mëtejshme e sëmundjes.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)